სპორტის საერთაშორისო დღესთან დაკავშირებით, 6 აპრილს საქართველოს სპორტისა და ახალგაზრდობის საქმეთა სამინისტროს ინიციატივით და სხვადასხვა სპორტული ფედერაციების ორგანიზებით, თბილისში, კუს ტბაზე მასშტაბური სპორტული ღონისძიებები გაიმართა სლოგანით – “იცხოვრე სპორტით”.

აქციის ფარგლებში კუს ტბის მიმდებარე ტერიტორიაზე სხვადასხვა სპორტული შეჯიბრები გაიმართა, მოეწყო საბავშვო კუთხე, სპორტის მუზეუმის საგამოფენო სივრცე დამთვალიერებლებისათვის. სპორტული ღონისძიებები დილის 11:00 საათიდან დაიწყო 17:00 საათამდე გაგრძელდა, მთლიანობაში კი სპორტულ შეჯიბრებში 500-მდე მონაწილე ჩაერთო.

ახალგაზრდებს შორის შეჯიბრებები მოეწყო სტრიტბოლში (ქუჩის კალათბურთი), გრეხეტბოლში (სახალისო ქუჩის ფეხბურთი), მეკლდეურობაში, ქვიშის ფრენბურთში, კანოეში, ხრიდოლში, ქართულ ჭიდაობაში, კარატეში, მკლავჭიდსა და ჭადრაკში, ასევე ნარდსა და მხიარულ სტარტებში, საჩვენებელი გამოსვლები გაიმართა უშუში, ჩერლიდინგში. გამარჯვებულებს და პრიზიორებს მაისურები, სიგელები, მედლები და სამახსოვსრო საჩუქრები გადაეცათ.

აქციის ფარგლებში, კუს ტბის საფეხბურთო მოედანზე ჩატარდა სპორტისა და ახალგაზრდობის საქმეთა სამინისტროს მინი-ფეხბურთის შიდა ჩემპიონატის ფინალური მატჩი, სადაც გლდანის ოლიმპიური რეზერვების მზადების ეროვნულა ცენტრმა 5:1 დაამარცხა ახალგაზრდობის ეროვნული ცენტრი და ტურნირის ჩემპიონი გახდა.

სპორტის საერთაშორისო დღისადმი მიძღვნილ ღონისძიებებს დაესწრნენ სპორტისა და ახალგაზრდობის საქმეთა მინისტრი – ლევან ყიფიანი მოადგილეებთან - ზურაბ აზმაიფარაშვილთან, აკაკი ლოდიასთან, თამაზ თევზაძესთან და რატი ბრეგაძესთან ერთად. კუს ტბაზე იმყოფებოდნენ ოლიმპიური კომიტეტის პრეზიდენტი – ლერი ხაბელოვი და სხვადასხვა სპორტული ფედერაციების ხელმძღვანელები.

www.msy.gov.ge