მიუნხენის “ბაიერნიდან” მარიო მანჯუკიჩისა და “რეალ სოსიედადიდან” ანტუან გრიზმანის შეძენის შემდეგ, მადრიდის “ატლეტიკო” გუნდის გაძლიერებაზე ფიქრს განაგრძობს. ამჯერად, მადრიდელთა მთავარი სამიზნეები ფერნანდო ტორესი და ხოსე მარია კალეხონი არიან, რომელთა თამაშიც დიეგო სიმეონეს ძალიან მოსწონს.

თუმცა, მათი შეძენა სერიოზულ პრობლემებთანაა დაკავშირებული. ჟოზე მოურინიუმ უკვე განაცხადა, რომ ტორესის გაყიდვას არ აპირებს და მასზე მომავალ სეზონში დიდ იმედებს ამყარებს. ამასთან, ძნელად სავარაუდოა, “ატლეტიკომ” ტორესის ფინანსური მოთხოვნების დაკმაყოფილება შეძლოს, რადგან ესპანელი “ჩელსიში” საკმაოდ მაღალ ხელფასს იღებს.

რაც შეეხება კალეხონს, გავრცელებული ინფორმაციით, “ატლეტიკომ” “ნაპოლის” კონკრეტული წინადადებით უკვე მიმართა და ფეხბურთელის სანაცვლოდ იტალიელებს 20 მილიონი ევრო შესთავაზა, მაგრამ კლუბის ხელმძღვანელებს აღნიშნული თანხა ეცოტავათ. ამის გარდა, ესპანელი რაფაელ ბენიტესის ერთ-ერთი საყვარელი ფეხბურთელია და მის გაშვებას არსად აპირებს. ამასთან, კალეხონი მადრიდის “რეალის” აღზრდილია და სამეფო კლუბიდან წამოსვლის შემდეგაც არ მალავს, რომ “ბლანკოსი” მისი საყვარელი გუნდია, რაც “ატლეტიკოსთვის” კიდევ ერთი სერიოზული დაბრკოლებაა.

შეგახსენებთ, რომ გუშინ “მსოფლიო სპორტმა” მადრიდელების მხრიდან რობერტო სოლდადოსადმი ინტერესის შესახებ გაუწყათ.

ლევან გოგოტიშვილი