ფრანგული პსჟ-ს არგენტინელი ფორვარდის ესეკიელ ლავესის მილანის “ინტერში” გადასვლა სულ უფრო ბუნდოვანი ხდება, თუმცა, სამაგიეროდ, ახლა მას მადრიდის “ატლეტიკოში” თავისი თანამემამულე დიეგო სიმეონე ეპატიჟება.
ესეკიელმა გავრცელებულ ცნობას, რომ მისი შეძენა “ინტერს” სურდა, თავშეკავებულად უპასუხა და აღნიშნა, რომ პარიზში თავს ბედნიერად გრძნობს. ამის შემდეგ მილანელებს თავი აღარ გამოუდიათ და უფრო ახალგაზრდა არგენტინელ ერიკ ლამელაზე გადაერთნენ, რომელიც “ტოტენჰემში” ვერ ათამაშდა.
AS-ის ცნობით, დიეგო სიმეონე უფრო მიზანსწრაფული უნდა იყოს, რადგან მას ძლიერ სურს 28 წლის ფორვარდით გუნდის გაძლიერება. მწვრთნელი არგენტინის ნაკრების ფეხბურთელს უფრო მნიშვნელოვან როლს სთავაზობს, ვიდრე ის პარიზში ასრულებს და ბრაზილიაში გასამართი მსოფლიოს ჩემპიონატის წინ ეს შესაძლოა გადამწყვეტი აღმოჩნდეს.
