რაფა ნადალს მართლაც განსაკუთრებული სეზონი აქვს. წლეულს 27 წლის მალიორკელმა 13 ტურნირში მიიღო მონაწილეობა, რომელთაგან 12 შეჯიბრების ფინალში ითამაშა. დღეს დილით კი ნადალმა აშშ-ის ღია პირველობის ფინალში რეიტინგსიის ლიდერს ნოვაკ ჯოკოვიჩს 6:2, 3:6, 6:4, 6:1 მოუგო, კარიერის განმავლობაში მეორედ მოიგო ნიუ იორკის ასპარეზობა, სადიდსლემო ტურნირში კი მეცამეტედ იმარჯვა. ამასთან, მიმდინარე სეზონში რაფამ ჰარდსაფარიან კორტზე 22-ივე ჩატარებული მატჩი მოიგო.

ჯოკოვიჩ-ნადალის ფინალი 3 საათსა და 21 წუთს გაგრძელდა. მისი დასრულების შემდეგ კი რაფამ ბედნიერების ცრემლი ვერ შეიკავა. სერბთან ურთიერთშეხვედრებს რაც შეეხება, ნადალი ჯოკოვიჩს 22:15-ს ამარცხებს.

“მეტად ემოციური ფინალი გამოვიდა. მხოლოდ ჩემი სამწვრთნელო შტაბის წევრებმა იციან, რას ნიშნავს ჩემთვის ეს გამარჯვება. ნოვაკის წინააღმდეგ ჩატარებული ნებისმიერი მატჩი განსაკუთრებულია. ჯოკოვიჩის მსგავსად ვერავინ მაიძულებს ასე ბოლომდე დავიხარჯო შეხვედრის მსვლელობისას”, - ამგვარი სახელდახელო რეზიუმე გაუკეთა გახარებულმა ნადალმა გადამწყვეტ მატჩს.

“ნადალი პრაქტიკულად უშეცდომოდ თამაშობდა, დროულად გამოდიოდა ბადესთან. გარდატეხის შესაძლებლობები მქონდა, მაგრამ ისინი ვერ გამოვიყენე. გულახდილად უნდა ვაღიარო – მოგებას არ ვიმსახურებდი”, - ბალკანელი ნაფინალევს სევდამორეული საუბრობდა.