2014 წელს უნგრეთში დაგეგმილი ევროპის ჩემპიონატის პლეი-ოფში საქართველოს წყალბურთელთა ეროვნული ნაკრების მეტოქე თურქეთი იქნება. აღნიშნული ცნობილი დღეს ესპანეთის ქალაქ ბარსელონაში გამართული წილისყრის შემდეგ გახდა.

პლეი-ოფისთვის სულ 6 წყვილი შედგა. როგორც დაგეგმილი გახლდათ, გასული ევროპირველობის შედეგებით მეშვიდე-მეთორმეტე ადგილებზე გასული ნაკრებები შესარჩევი ციკლის მოწინავე ექვსეულს დაუწყვილდნენ.

შეგახსენებთ, რომ ქართველმა წყალბურთელებმა სამ ეტაპად გამართული საკვალიფიკაციო ეტაპი მე-3 ადგილზე დაასრულეს და ფორმატის მიხედვით, მეტოქედ წინა ევროპის ჩემპიონატის მეათე-მეთორმეტე გუნდებიდან ერთ-ერთი უნდა რგებოდათ.

უნდა ითქვას, რომ საქართველოს ნაკრებს გაუმართლა და თამაში მე-12 ადგილოსან თურქეთთან მოუწევს, რომელმაც ჰოლანდიის ქალაქ ეინდჰოვენში 2012 წლის იანვარში გამართულ ჩემპიონატზე შვიდივე მატჩი წააგო.

თურქეთი ჯგუფურ ეტაპზე მაკედონიასთან (4:16), იტალიასთან (7:24), საბერძნეთთან (2:20), ჰოლანდიასთან (7:12) და უნგრეთთან (2:22) დამარცხდა, მეშვიდე-მეტორმეტე ადგილებისთვის მატჩებში კი ესპანეთს (4:16) და იმავე მაკედონიას (7:9) ვერ გაუმკლავდა.

ცნობილია, რომ ქართველი წყალბურთელები პლეი-ოფის პირველ მატჩს თბილისში მომავალი წლის 15 თებერვალს ჩაატარებენ, განმეორებითი შეხვედრა კი სტუმრად 1 მარტს ელით და წარმატების შემთხვევაში, ევროპის ჩემპიონატის ფინალურ ეტაპზე ისტორიაში პირველად ითამაშებენ.

2014 წლის ევროპის პირველობა 14-27 ივლისს უნგრეთის დედაქალაქ ბუდაპეშტში ჩატარდება, მომავალი ტურნირის საგზურები კი უკვე დაბევებული აქვთ მასპინძელ უნგრეთს და გასული ევროპის ჩემპიონატის მოწინავეებს – სერბეთს, ჩერნოგორიას, იტალიას, გერმანიას და საბერძნეთს.

ცნობისთვის, პლეი-ოფში მოულოდნელად მოხვდა მალტის ნაკრებიც, რომელმაც წინა ევროპის პირველობის მე-11 ადგილოსანი მაკედონია ჩაანაცვლა. ამ უკანასკნელთ თამაშზე უარი ფინანსური პრობლემების გამო განაცხადეს. წილისყრის შედეგად, მალტელები საფრანგეთს შეხვდნენ, რომელმაც პლეი-ოფში ასევე შესარჩევი ეტაპიდან გააღწია.

ერთი საინტერესო დეტალიც. რუსეთის წყალბურთის ფედერაციის ვებ-გვერდმა წილისყრის თავისებური შედეგები გამოაქვეყნა: საქართველოს ნაკრები პლეი-ოფს მიღმა დატოვა და თურქეთს გერმანიის ეროვნული გუნდი დაუწყვილა, რომელმაც გასული ევროპის ჩემპიონატი მე-5 ადგილზე დაასრულა და როგორც აღვნიშნეთ, ფინალურ ეტაპზე თამაში ისედაც გარანტირებული აქვს. მოკლედ, რუსული ვერსიით, ევროპის პირველობაზე გასვლის შანსი არა გვაქვს...

2014 წლის ევროპის ჩემპიონატის პლეი-ოფი წყალბურთში. 15 თებერვალი – 1 მარტი

უკრაინა – ესპანეთი

რუმინეთი – დიდი ბრიტანეთი

სლოვაკეთი – ხორვატია

ჰოლანდია – რუსეთი

საფრანგეთი – მალტა

საქართველო – თურქეთი