“მანჩესტერ სიტის” ჩილელი დამრიგებელი მანუელ პელეგრინი ევროტურნირების მომდევნო ორ მატჩში გუნდის სათადარიგოთა სკამზე ვერ იქნება. ამის მიზეზი UEFA-ს მიერ მისთვის მიცემული დისკვალიფიკაციაა.

“ბარსელონასთან” გამართული საშინაო შეხვედრის (0:2) შემდეგ, პელეგრინიმ მთავარი მსაჯი იონას ერიკსონი გააკრიტიკა და განაცხადა, რომ შვედმა არბიტრმა “ბარსელონას სასარგებლოდ იმსაჯა.

დღეს, ცნობილი გახდა, რომ UEFA-ს სადისციპლინო კომიტეტმა ჩილელ სპეციალისტს ორმატჩიანი დისკვალიფიკაცია მისცა. გარდა ამისა, ერთმატჩიანი დისკვალიფიკაცია პელეგრინის პირობით აქვს მისჯილი და მას გამოსაცდელ ვადად 2 წელი დაენიშნა. ეს ნიშნავს, რომ პელეგრინი “ბარსელონასთან” გასამართ განმეორებით თამაშსა და “სიტის” მომდევნო ევროტურნირის შეხვედრაში გუნდს ვერ უთავკაცებს.