“ბარსელონას” ერთ-ერთმა ლიდერმა, ჩავი ერნანდესმა, ოთხშაბათს გამართულ პრესკონფერენციაზე, არაერთ საინტერესო თემაზე ისაუბრა. 33 წლის კატალონიელმა კომენტარი “რეალზე”, ფაბრეგასზე, ტიაგოსა და ნეიმარზე გააკეთა.

“ნეიმარი ის ფეხბურთელია, რომელსაც გუნდებს შორის სხვაობის შექმნა შეუძლია. მას შეუძლია გატანა და თამაშის მიმდინარეობის შეცვლა. ის ბრწყინვალე ფეხბურთელია, რომლის თამაშითაც სიამოვნებას მივიღებთ. ნეიმარს ადაპტაციასთან დაკავშირებით არანაირი პრობლემა არ ექნება. ის და მესი ერთმანეთს უკეთესს გახდიან.”

“შეცდომა იყო თუ არა ტიაგოს “ბაიერნში” გადასვლა? ამას დრო გვიჩვენებს. ის დიდი ტალანტია, რომელმაც წასვლა გადაწყვიტა. “ბარსელონამ” მომავალი ვარსკვლავი დაკარგა, მაგრამ ამ კლუბში ასეთები კვლავ არიან. მაგალითად, სერხი რობერტო.”

“ფაბრეგასი მშვიდი და მოტივირებულია. მის ტრანსფერთან დაკავშირებით სათქმელი არაფერია. გავრცელებული ინფორმაცია პრესის მიერ მოგინილი ჭორია.”

“რეალის” თამაში თითქმის არ მინახავს. ვფიქრობ, მადრიდელები ახალგაზრდა და ნიჭიერი ფეხბურთელებით საკმაოდ გაძლიერდნენ. ისინი ღირსეულ კონკურენციას გაგვიწევენ. “რეალი”, როგორც ყოველთვის, ტიტულებისთვის იბრძოლებს.

ბეილი? მისი მონაწილეობით სრული თამაში არ მინახავს. არ ვიცი, რამდენი ღირს ის.” – აცხადებს ჩავი ერნანდესი.