საქართველოს მორაგბეთა ეროვნულმა ნაკრებმა, 2014 წლის ერთა თასისა და 2015 წლის მსოფლიო თასის შესარჩევი ეტაპის ბოლოსწინა ტურის მატჩში ესპანეთს მადრიდში 24:17 აჯობა, მაგრამ ოთხი ლელო ვერ გაიტანა და დასკვნითი შეხვედრის წინ რუმინეთს სატურნირო ცხრილში 1 ქულით ჩამორჩა.
საწყის ნახევარ საათში “ბორჯღალოსნები” მერაბ კვირიკაშვილის ორი ჯარიმით და ერთი არეკნით 9:0 დაწინაურდნენ, მაგრამ მერე ორი შეცდომა ორ ლელოდ დაუჯდათ და ტაიმი 9:14 დათმეს. მეორე ტაიმი ქართველმა მორაგბეებმა ისევ არეულად დაიწყეს, მაგრამ 50-ე წუთზე მასპინძლებს პირველხაზელი გაუსინბინეს და მეტობა საქართველოს ნაკრებმა სათანადოდ გამოიყენა - მამუკა გორგოძემ და გიორგი თხილაიშვილმა ლელოები გაიტანეს, ხოლო კვირიკაშვილმა ერთი გარდასახვა გამოიყენა.
მანვე ჯარიმით ანგარიში 24:14 გახადა, მაგრამ ესპანეთმა 76-ე წუთზე ერთი ჯარიმის გატანა შეძლო, 17:24 დამარცხდა და 7 ქულით მარცხისთვის პრემიალური ქულა ჩაიწერა. ერთა თასის დღეს გამართულ სხვა ორ მატჩში გამარჯვებულმა გუნდებმა პრემიალური ქულების აღება შეძლეს. რუმინეთმა ბელგია 29:10 დაამარცხა და თბილისს ერთა თასისა და მსოფლიო თასის შესარჩევი ეტაპის ლიდერის რანგში ეწვევა, ხოლო რუსეთმა პორტუგალიას 34:18 სძლია და მსოფლიო თასის საგზურისთვის ბრძოლას საკონტინენტთაშორისო რეპეშაჟში განაგრძობს.
2014 წლის ევროპის ერთა თასი. 2015 წლის მსოფლიო თასის შესარჩევი ეტაპი
მეორე წრე. მეოთხე ტური
8 მარტი
ესპანეთი - საქართველო 17: 24 (14:9)
რუსეთი - პორტუგალია 34:18
რუმინეთი - ბელგია 29:10
| 1 | რუმინეთი | 9 | 8 | 1 | 0 | 233-84 | 38 |
| 2 | საქართველო | 9 | 8 | 1 | 0 | 264-97 | 37 |
| 3 | რუსეთი | 9 | 5 | 0 | 4 | 185-229 | 23 |
| 4 | პორტუგალია | 9 | 2 | 1 | 6 | 121-194 | 11 |
| 5 | ესპანეთი | 9 | 1 | 2 | 6 | 131-219 | 11 |
| 6 | ბელგია | 9 | 0 | 1 | 8 | 114-225 | 6 |
მომდევნო ტური. 15 მარტი
საქართველო - რუმინეთი
პორტუგალია - ესპანეთი
ბელგია - რუსეთი
