9 მატჩი, 9 მოგება – ასეთია ლევან ფაცაციას “ნიჟნი ნოვგოროდის” მონაგარი, რომელიც ვთბ-ლიგაში დაუმარცხებელ სვლას განაგრძობს. რუსული კლუბის მორიგი მეტოქე ბელარუსის “ცმოკი-მინსკი” იყო და მასპინძლებმა, რომლებიც ლიდერ ტეილორ როჩესტის გარეშე თამაშობდნენ, 70:65 იმარჯვეს.

სასიხარულოა, რომ ქართველი კალათბურთელი სასტარტო ხუთეულში იყო და 14:27 წუთში 5 ქულა, 1 მოხსნა და 1 დაფარება მოაგროვა. ფაცაციამ 2-დან 1 ორქულიანი ჩააგდო და სამქულიანებშიც ასეთივე მონაგარი ჰქონდა. ლევანს ბურთი არ დაუკარგავს, 3 პერსონალური ფოლი მიიღო, მის წინააღმდეგ კი ერთხელ დაჯარიმდნენ.

ნოვგოროდელთა რიგებში ყველაზე შედეგიანი ამერიკელი ტერენს კინსი გახლდათ 22 ქულით, ბელარუსმა ცენტრმა არტიომ პარახუსკიმ კი ორმაგი დუბლი მიითვალა – 17 ქულა, 13 მოხსნა.

ფაცაციას კლუბი ვთბ-ლიგას ერთპიროვნულად ლიდერობს, მომდევნო მატჩს კი 15 დეკემბერს რიგაში ვეფ-თან ჩაატარებს. ისიც ვთქვათ, რომ ხვალ მანუჩარ მარკოიშვილის ცსკა ვიქტორ სანიკიძის “უნიკსს” უმსპინძლებს და შესაძლოა, ქართული დაპირისპირებაც ვიხილოთ.