ესპანეთის ჩემპიონატის მე-13 ტური “ანოეტაზე” გამართული შეხვედით გაიხსნა. “რეალ სოსიედადს” საშინაო არენაზე პირველად უძღვებოდა დევიდ მოიესი და როგორც მოგვიანებით გაირკვა, შოტლანდიელ სპეციალისტს სან-სებასტიანში შესანიშნავი დებიუტი გამოუვიდა. ბასკებმა ვალენსიური “ელჩე” ველას ჰეთ-თრიკით უპრობლემოდ დაამარცხეს.
მასპინძლებმა შეხვედრა ძალიან აქტიურად დაიწყეს და მე-3 წუთზე მარტინესის ჩაწოდების შემდგომ, კარლოს ველამ თავური დარტყმით ანგარიში გახსნა. მე-8 წუთზე დევიდ მოიესს იძულებითი შეცვლის გაკეთება მოუწია, იმანოელ აგირეჩემ ტრავმა მიიღო და მოედანზე ისლანდიელი ფორვარდი, ალფრეო ფინბოგასონი გამოჩნდა. სტუმრები გაშვებული გოლის შემდეგ ოდნავ გამოფხიზლდნენ. განსაკუთრებით აქტიურობდა ბრაზილიელი ფორვარდი ჯონათასი, რომელიც რამდენჯერმე დაემუქრა ზუბიკარაის კარს. მატჩის ბედი 31-ე წუთზე გადაწყდა, ხაბი პრიეტომ შესანიშნავი გადაცემით ერთი-ერთზე გაიყვანა ველა, რომელმაც დუბლი გაიფორმა.
მასპინძლებმა მეორე ტაიმიც კარგად დაიწყეს და დე ლა ბელას უმალ შეეძლო გატანა, მაგრამ ტიტონმა აჯობა. სამაგიეროდ, 53-ე წუთზე კარლოს ველას ვერ აჯობა, რომელმაც შესანიშნავი დარტყმით მესამედ დაამწუხრა პოლონელი მეკარე. დარჩენილ დროში სტუმრებს კოროს მომენტს თუ არ ჩავთვლით, ღირებული არაფერი შეუქმნიათ, ხოლო მასპინძლები აღარ ინდომებდნენ და შესაბამისად, ანგარიში აღარ შეცვლილა – 3:0. დევიდ მოიესმა ესპანეთში პირველი გამარჯვება მოიპოვა, ხოლო მისმა კლუბმა მიმდინარე ლა ლიგაში მე-3 მატჩი მოიგო და 13 ქულით მე-12 პოზიციამდე აღზევდა. რაც შეეხება “ელჩეს”, ფრან ესკრიბას კლუბი 10 ქულით მე-19 ადგილზეა და მხოლოდ “კორდობას” უსწრებს, რომელიც ჯერაც პირველი გამარჯვების მოლოდინშია.
სოსიედადი – ელჩე 3:0 (2:0)
სან-სებასტიანი, “ანოეტა”
სოსიედადი (4-2-3-1): ზუბიკარაი, ანსოტეგი, გორკა, კ.მარტინესი, დე ლა ბელა, ბერგარა, გრანერო, კანალესი (პარდო 71), პრიეტო, ველა (კასტრო 87), აგირეჩე (ფინბოგასონი 8).
მწვრთნელი: დევიდ მოიესი
ელჩე (4-4-2): ტიტონი, პელეგრინი, ლომბანი, დ.სუარესი, სისმა, მოსკერა (ანხელი 76), ა.გონსალესი, ფაჟრი (გ.როდრიგესი 46), ვ.როდრიგესი, კ.ერერა (კორო 60), ჯონათასი.
მწვრთნელი: ფრან ესკრიბა
გოლები: ველა 3;31;53.
გაფრთხილებები: ანსოტეგი, კანალესი – ა.გონსალესი, ვ.როდრიგესი, გ.როდრიგესი, სისმა
მსაჯი: ველასკო კარბალიო
