„პარი სენ-ჟერმენის“ მთავარმა მწვრთნელმა ლუის ენრიკემ საფრანგეთის თასის ნახევარფინალში „დიუნკერკთან“ გამარჯვების (4:2) შემდეგ ისაუბრა.
როგორც ესპანელმა სპეციალისტმა თქვა, პსჟ არ არის სრულყოფილი და უძლეველი გუნდი.
„მატჩის რთულ დასაწყისზე ასახსნელი არაფერია, ფეხბურთი სიურრეალისტური სპორტია. „დიუნკერკის“ ფეხბურთელებმა პირველ ტაიმში ორჯერ გადაკვეთეს მოედნის ცენტრი და ჩვენი შეცდომებით ორი გოლი გაიტანა. 0:2 უსამართლო და არარეალური ანგარიში იყო. დღევანდელ სცენარს არანაირი კავშირი არ ჰქონდა „სენტ ეტიენთან“ მატჩის დასაწყისთან. ვფიქრობ, ჩემმა გუნდმა აჩვენა სიმწიფე და ამბიცია, რომ ყველაფერი შეცვალოს მატჩის მიმდინარეობისას.
ფეხბურთი ცვალებადი სპორტია, შეიძლება ყველაფერი გაიღო და მაინც წააგო. ყოველთვის მტკივნეულია ფინალამდე ერთი ნაბიჯის მოშორებით გაჩერება, ამიტომ, ვულოცავთ ჩვენს თავს ფინალში გასვლას, მშვენიერი იქნება „სტად დე ფრანსზე“ თამაში.
ყველა თამაშში ყოველთვის არის შეცდომები. მეორე გოლი ჩვენი უყურადღებობით გავიდა. ზოგადად, ჩვენ არ ვართ დაუმარცხებლები, უძლეველი, არ ვართ ფილმის გმირები. უბრალოდ საფეხბურთო გუნდი ვართ და გოლი შეიძლება ნებისმიერ მომენტში გავუშვათ. სრულყოფილება არ არსებობს და არც ჩვენ ვართ სრულყოფილი გუნდი.
სიმართლე გითხრათ, პირველი ტაიმით კმაყოფილი ვიყავი, მობილურობით, ბურთის კონტროლით. ძალიან რთულია სივრცეების პოვნა, როცა მეტოქის 10 ფეხბურთელი საჯარიმოშია. მსგავსი სიტუაციების გასაღები ყოველთვისაა რწმენა და სტრუქტურის შენარჩუნება. ფინალში გასვლა დავიმსახურეთ, მაგრამ „დიუნკერკს“ თასზე შესანიშნავ გამოსვლას ვულოცავ.
ჩვენი მეორე გოლი იმ კუთხურს მოჰყვა, რომელიც არ უნდა დანიშნულიყო? შეგიძლიათ იფიქროთ, ამან შედეგზე გავლენა მოახდინა, მაგრამ ჩვენ კარისკენ 30 დარტყმა გვქონდა და თქვენ მელაპარაკებით სიტუაციაზე, რომელიც შეიძლება სადავო იყოს. როგორც წესი, დეტალებს არ ვეკიდები, აშკარად დავიმსახურეთ ფინალში გასვლა და დეტალებზე შეჩერება არ მინდა“, - თქვა ლუის ენრიკემ.
შეგახსენებთ, რომ „პარი სენ-ჟერმენი“ საფრანგეთის თასის ფინალში „კაენი“ – „რეიმსის“ წყვილში მოგებულს შეხვდება.
