ლუკა ლოჩოშვილის ტრავმა სერიოზული არ გამოდგა და „სალერნიტანას“ „პალერმოს“ წინააღმდეგ მატჩში დაეხმარება.
ქართველმა მცველმა დაზიანების გამო მოედანი სომხეთთან შეხვედრის მეორე ტაიმში დატოვა, რის გამოც საპასუხო მატჩის გამოტოვება მოუწია. თუმცა, ტრავმა საშიში არაა და როგორც სალერნოელთა მთავარმა მწვრთნელმა რობერტო ბრედამ აღნიშნა, ის გუნდის განკარგულებაშია.
„ლოჩოშვილმა ფეხში უბრალოდ დარტყმა მიიღო, სერიოზული ტრავმის მხოლოდ შიში იყო, მაგრამ გუნდთან ერთად რეგულარულად ვარჯიშობდა და ხელმისაწვდომია“, - თქვა ბრედამ.
შეგახსენებთ, რომ ლუკა ლოჩოშვილი „სალერნიტანას“ გასულ ზამთარს „კრემონეზედან“ იჯარით შეუერთდა და დღემდე 10 მატჩში მიიღო მონაწილეობა.
