„ნაპოლის“ ფეხბურთელმა დავიდ ნერეშმა ანტონიო კონტეზე ისაუბრა. როგორც მან თქვა, ამ 6 თვეში უფრო მეტი ირბინა, ვიდრე მანამდე მთელ კარიერაში, რადგან კონტე ძალიან მომთხოვნი მწვრთნელია.

„კონტე ძალიან კარგი მწვრთნელია, ყველა ფეხბურთელისგან ბევრს ითხოვს და ეს ჩემთვის კარგია, რადგან როდესაც მწვრთნელი მომთხოვნი არ არის, ვდუნდები. ის შენში საუკეთესოს ავლენს, მოტივაციას ისე გაძლევს, როგორც არც ერთი მწვრთნელი. გსაყვედურობს კიდეც, ეს „ნაპოლიში“ გადასვლიდან ორ კვირაში ჩემს შემთხვევაში მოხდა, ამხანაგურ მატჩში ბოლომდე მონდომებული არ ვიყავი და ყველაფერი პირდაპირ მითხრა. მაშინ მივხვდი, ვინ იყო ჩემს წინ და როგორ უნდა მოვქცეულიყავი. ეს მჭირდებოდა. კონტეს ვარჯიშის მეთოდები ყველაზე რთულია, რაც კი ოდესმე მინახავს. ამ 6 თვეში უფრო მეტი ვირბინე, ვიდრე მანამდე ჩემს კარიერაში“, - თქვა ნერეშმა.

შეგახსენებთ, დავიდ ნერეშმა მიმდინარე სეზონში ყველა ტურნირზე ჩატარებულ 24 შეხვედრაში 3 გოლი გაიტანა, ხოლო 8-ჯერ საგოლე პასი გააკეთა.