საქართველოს 19-წლამდე ნაკრებმა ევროპის 2025 წლის ჩემპიონატის ელიტ-რაუნდი ვერ დაძლია და შესაბამისად, ფინალური ეტაპის საგზური ვერ მოიპოვა.
ლაშა ფირცხალაიშვილის გუნდს ბოლო ტურში მონტენეგრო აუცილებლად უნდა დაემარცხებინა, პარალელურად, პოლონეთს სლოვაკეთთან ვერ მოეგო, რათა პირველი ადგილი დაეკავებინა, თუმცა არც ერთი გამოვიდა.
საბა გეგუჩაძის გოლით საქართველო მონტენეგროსთან მეშვიდე წუთზე სწრაფად დაწინაურდა. შემდეგ ვახტანგ სალიას ორი კარგი მომენტი ჰქონდა, თუმცა ჯერ ხარიხამ იხსნა სტუმრები, მერე - ძელმა.
გამოუყენებელი მომენტებისთვის მასპინძლები დაისაჯნენ. ტაიმის მიწურულს პეროვიჩმა ანგარიში გაათანაბრა. მეორე ტაიმის დასაწყისში ცამაიმ წინ გაიყვანა მონტენეგრო, ხოლო 88-ე წუთზე კოსტიჩმა საბოლოო ანგარიში დააფიქსირა - მონტენეგრომ 3:1 მოიგო.
ელიტ-რაუნდის ჯგუფს თბილისმა უმასპინძლა, საქართველომ კი, ჯგუფში 3 ქულით მესამე ადგილი დაიკავა, პოლონეთსა (0:3) და მონტენეგროსთან (1:3) წააგო, ხოლო სლოვაკეთს მოუგო (2:0).
ჯგუფში პირველ ადგილზე 7 ქულით მონტენეგრო გავიდა და შესაბამისად, ევროპის ჩემპიონატის საგზურიც მოიპოვა. მეორე საფეხური 6 ქულით პოლონეთს ერგო, ხოლო სლოვაკეთი 1 ქულით ბოლო საფეხურს დასჯერდა.
საქართველო - მონტენეგრო 1:3 (1:1)
საქართველო: საური, მეფარიშვილი, ხარებაშვილი, ნიკოლაიშვილი, ამისულაშვილი (ოდიკაძე 79), გოგსაძე, ფეიქრიშვილი, გეგუჩაძე (ბუბუტეიშვილი 61), ბერელიძე (გვასალია 65), სალია (ჩიქოვანი 65), სამუშია (ნაჭყებია 65)
გოლები: 1:0 გეგუჩაძე (7), 1:1 პეროვიჩი (39), 1:2 ცამაი (58), 1:3 კოსტიჩი (88)
