საქართველოს 21-წლამდე ნაკრებმა თურქულ შეკრებაზე მეორე ამხანაგური მატჩი ჩაატარა და ისევ გაიმარჯვა.

რამაზ სვანაძის გუნდმა სამი დღის წინ ფინეთი 4:2 დაამარცხა, ხოლო დღეს სერბეთის ახალგაზრდულ ნაკრებს, რომელსაც ალექსანდრ კოლაროვი წვრთნის, 3:1 აჯობა. უნდა აღინიშნოს, რომ სერბებს 2 წლით პატარა ფეხბურთელები ჰყავდათ შემადგენლობაში, რადგან ეს გუნდი ევროპის ჩემპიონატზე ვერ თამაშობს და მხოლოდ მომდევნო საკვალიფიკაციო ეტაპისთვის ემზადება.

საქართველოს ნაკრების შემადგენლობა გადახალისებული იყო, თავის გამოჩენის შესაძლებლობა განაცხადში მყოფ ყველა ფეხბურთელს მიეცა.

ანგარიში მე-11 წუთზე გაბრიელ სიგუამ გახსნა, რომელმაც მეტოქის შეცდომით ისარგებლა და ცარიელ კარში გაიტანა. სერბებმა მალევე მიტროვიჩის პენალტით აღადგინეს წონასწორობა, თუმცა პირველი ტაიმის ბოლოს თორნიკე მორჩილაძემ თავისივე მოპოვებული ზუსტად შეასრულა და ისევ საქართველო დააწინაურა. მატჩის მიწურულს გიორგი იაკობიძემ სხვაობა ორამდე გაზარდა და საბოლოო ანგარიში დააფიქსირა - 3:1.

რამაზ სვანაძის გუნდი ევროპის ჩემპიონატისთვის ემზადება, სადაც ივნისში ითამაშებს, ჯგუფში პოლონეთის, საფრანგეთისა და პორტუგალიის წინააღმდეგ. ეს იქნება ზედიზედ მეორე ევროპის 21-წლამდე ნაკრებისთვის, რომელმაც 2023 წელს ჯგუფში პირველი ადგილი დაიკავა ნიდერლანდებთან, ბელგიასა და პორტუგალიასთან კონკურენციაში, ხოლო მეოთხედფინალში ისრაელთან პენალტების სერიაში დამარცხდა.

სერბეთი - საქართველო 1:3 (1:2)

ანტალია

საქართველო: თანდილაშვილი (მაქაცარია 46), მაისურაძე (კვერნაძე 65), რუხაძე (ოდიშარია 61), ოდიშვილი (იაკობიძე 46), ხვადაგიანი (უგრეხელიძე 86), სიგუა (გაგნიძე 61), გ. მამაგეიშვილი (მამაცაშვილი 61), მორჩილაძე (ლომინაძე 61), ეგოიანი (გოცირიძე 46), ო. მამაგეიშვილი (აბუაშვილი 61), იობაშვილი (ოსიყმაშვილი 46)

გოლები: 0:1 სიგუა (11), 1:1 მიტროვიჩი (28, პენ), 1:2 მორჩილაძე (45, პენ), 1:3 იაკობიძე (84)

საქართველოს 21-წლამდე ნაკრების კალენდარი ევროპის ჩემპიონატზე:

11 ივნისი: პოლონეთი - საქართველო

14 ივნისი: საფრანგეთი - საქართველო

17 ივნისი: საქართველო - პორტუგალია