იტალიის ნაკრების მთავარი მწვრთნელი ლუჩანო სპალეტი გუნდში „ინტერის“ მცველის ფრანჩესკო აჩერბის გამოძახებას არ აპირებს, მიზეზად კი, ასაკს ასახელებს. აჩერბი უკვე 37 წლისაა და ბუნებრივია, მასთან დაკავშირებით სპალეტის შორეული გეგმები ვერ ექნება.

გერმანიასთან მატჩის (3:3) შემდეგ გაირკვა, რომ იტალია მუნდიალის შესარჩევ ეტაპზე ნორვეგიასთან ერთად იქნება ჯგუფში, რომელსაც ივნისში სტუმრად პირველი ტურის ეგიდით შეხვდება. სწორედ ამიტომ, სპალეტის ჰკითხეს, ხომ არ აპირებს ივნისში აჩერბის გამოძახებას, რომელმაც „ინტერის“ რიგებში „მანჩესტერ სიტისთან“ მატჩებში ერლინგ ჰოლანდის წინააღმდეგ ყოველთვის ძალიან კარგად ითამაშა და ახლაც, უკვე იტალიის ნაკრებს შეიძლება ჰოლანდის შესაჩერებლად აჩერბი გამოადგეს. თუმცა, სპალეტი ამ ნაბიჯის გადადგმას არ აპირებს:

„მაგრამ იცი, აჩერბი რამდენი წლისაა? 37-ის ხომ? კარგი გავიგე. ჩემი აზრით, ბასტონის, ბონჯორნოს და კალაფიორის შესანიშნავი და იგივე თვისებები აქვთ. აჩერბი ფანტასტიკური ფეხბურთელია, გეთანხმებით, ის ძალიან კარგად თამაშობს, თუმცა მჯერა ამ ფეხბურთელების, რომლებსაც ნაკრებში ვიწვევ. ჩემი აზრით, ეს ფეხბურთელები ამას იმსახურებენ და გავაგრძელებ მათ გამოძახებას. შემადგენლობა მეტ-ნაკლებად დაკომპლექტებულია, რჩევისთვის მადლობა“, - თქვა სპალეტიმ.

შეგახსენებთ, რომ ფრანჩესკო აჩერბიმ იტალიის ნაკრებში 2014-2023 წლებში 34 მატჩი ჩაატარა და 1 გოლი გაიტანა. ის 2021 წელს ევროპის ჩემპიონის ტიტულსაც დაეუფლა, როცა ხშირად თამაში არ უწევდა, მაგრამ შემადგენლობაში იყო.