უეფას ერთა ლიგის A დივიზიონში მეოთხედფინალური ეტაპის პირველი მატჩები გაიმართა, რომლებიც ძალიან საინტერესო გამოდგა.

ესპანეთის ნაკრები უკვე ერთი წელია არ აგებს, ზედიზედ 17 მატჩია. არადა, ევროპის მოქმედი ჩემპიონი ახლოს იყო როტერდამში ნიდერლანდებთან მარცხთან, მიუხედავად იმისა, რომ ნიკო ვილიამსის სწრაფი გოლით დაწინაურდა. შემდეგ მასპინძლებმა კოდი გაკპოს და ტიჯანი რეინდერსის გოლებით წინ გასვლა შეძლეს. თუმცა 90-ე წუთზე მიკელ მერინომ აღადგინა წონასწორობა - 2:2. ესპანეთი წყვილში ფავორიტად იქცა. ამ ნაკრებების დუელი საქართველოს ნაკრებისთვისაც მნიშვნელოვანია, რადგან ამ წყვილში გამარჯვებული მსოფლიოს ჩემპიონატის საკვალიფიკაციო ეტაპზე საქართველოს ნაკრების ჯგუფში იქნება. დიდი შანსია, ეს ესპანეთი იყოს, დიახ, ისევ ესპანეთი...

საფრანგეთის ნაკრები სპლიტში, მოულოდნელად ხორვატიის ნაკრებთან 0:2 დამარცხდა და ძალიან გაირთულა სიტუაცია. ანტე ბუდიმირმა და ივან პერიშიჩმა პირველივე ტაიმში გაუტანეს მეტოქეს ორი უპასუხო გოლი. იქამდე, ანდრეი კრამარიჩმა პენალტიც ვერ გაიტანა.

იტალიის ნაკრები გერმანიას შიშის ზარს რომ სცემდა, ეს დროც წარსულს ჩაბარდა. „სკუადრა აძურა“ მილანში დამარცხდა „ბუნდესნაკრებთან“. სანდრო ტონალიმ სწრაფი გოლით იტალია დააწინაურა, მაგრამ მეორე ტაიმში ილიან ნაგელსმანის გუნდმა მეტოქეს ორი გოლი გაუტანა და 2:1 მოიგო. შესაბამისად, გერმანიის ნაკრები ნახევარფინალთან ახლოსაა.

კიდევ ერთი ფავორიტი დამარცხდა: პორტუგალიამ კოპენჰაგენში დანიასთან 0:1 წააგო და ახლა შინ ეცდება ნახევარფინალის საგზურის მოპოვებას.

ხორვატია - საფრანგეთი 2:0 (2:0)

გოლები: 1:0 ბუდიმირი (26), 2:0 პერიშიჩი (45)

დანია - პორტუგალია 1:0 (0:0)

გოლი: 1:0 ჰოილუნი (78)

იტალია - გერმანია 1:2 (1:0)

გოლები: 1:0 ტონალი (9), 1:1 კლეინდიენსტი (49), 1:2 გორეცკა (76)

ნიდერლანდები - ესპანეთი 2:2 (1:1)

გოლები: 0:1 ნიკო ვილიამსი (9), 1:1 გაკპო (28), 2:1 რეინდერსი (46), 2:2 მერინო (90)

დღესვე, ერთა ლიგაში სარელეგაციო მატჩები გაიმართა:

A/B დივიზიონების პლეი-ოფის მატჩში ასვტრია და სერბეთი დაზავდნენ (1:1), ხოლო შოტლანდიამ სტუმრად საბერძნეთი 1:0 დაამარცხა. უკრაინამ ბელგია 3:1 დაამარცხა და დიდი ნაბიჯი გადადგა ელიტური დივიზიონისკენ.

B/C დივიზიონის პლეი-ოფში ირლანდიამ სტუმრად ბულგარეთს 2:1 მოუგო, კოსოვომ ისლანდია 2:1 დაამარცხა, ხოლო სლოვაკეთი და სლოვენია უგოლოდ დაზავდნენ.