„სანტოსის“ ფეხბურთელმა ნეიმარმა პოდკასტში სტუმრობისას გაიხსენა 2013 წელის ზაფხული, როცა მას პეპ გვარდიოლა ესტუმრა და ცდილობდა, მიუნხენის „ბაიერნში“ გადასვლაზე დაეყოლებინა:

„პუშკაშის პრიზი მოვიგე და მამაჩემმა ღამის 2 საათზე დამირეკა. ვუპასუხე და მითხრა, კარი გამიღეო. საცვლებში ვიყავი. როდესაც კარი გავაღე, მივხვდი, რომ მასთან ერთად გვარდიოლა და თარჯიმანი იყვნენ. შიგნით შევედი, შორტები ჩავიცვი და მამაჩემს ვუთხარი, როგორ არ გამაფრთხილა.

გვარდიოლამ ჩემთან საუბარი დაიწყო და მითხრა, რომ სურდა ჩემი წაყვანა იმ გუნდში, რომელშიც გადასვლას აპირებდა. მაშინ ის უმუშევარი იყო, მაგრამ ახალ კლუბთან კონტრაქტი გაფორმებული ჰქონდა და არ შეეძლო გუნდზე საუბარი. გვარდიოლამ მითხრა: „მინდა, ჩემთან ერთად წამოხვიდე, საუკეთესოს გაგხდი“. მან ფურცელი აიღო და ამიხსნა: „აქ ითამაშებ, ამას გააკეთებ და თუ წელიწადში 60 გოლს ვერ გაიტან, სახელს შევიცვლი“.

კანკალი დავიწყე, მერე ვკითხე, რომელ გუნდში მიდიოდა, სანამ მიპასუხებდა, მითხრა, რომ არ შეეძლო თქმა, მაგრამ შემდეგ მითხრა, რომ „ბაიერნში“ მიდიოდა“, - თქვა ნეიმარმა.

შეგახსენებთ, რომ საუბარი 2013 წელზეა, როცა გვარდიოლამ „ბაიერნი“ ჩაიბარა, ხოლო ნეიმარი იმავე ზაფხულს „სანტოსიდან“ „ბარსელონაში“ გადავიდა.