ესპანეთის ლა ლიგა 2-ის პირველ ტურში „ლევანტე“ სტუმრად ხიხონის „სპორტინგს“ ეწვია, რომელიც 2:1 დაამარცხა, გიორგი ქოჩორაშვილმა კი გოლი გაიტანა.
ქართველმა შეუცვლელად ითამაშა და მოედანზე საუკეთესო იყო. ქოჩორა ჩვეულად იბრძოდა, შლიდა მეტოქის იერიშებს და იწყებდა თავისი გუნდის შეტევებს. რაც შეეხება გოლს, ჯარიმით გაიტანა.
42-ე წუთზე მან ძალიან შორი მანძილიდან იდეალურად დაარტყა ჯარიმა, არადა, ყველა ელოდა, რომ ის საჯარიმოში ჩააწოდებდა ბურთს, მაგრამ მოულოდნელი გადაწყვეტილება მიიღო და სეზონი გოლით დაიწყო. ცნობისთვის, ქოჩორაშვილმა ჯარიმით გოლი ლა ლიგა 2-ის გასულ სეზონშიც გაიტანა.
გიორგის ამ გოლით ვალენსიელები 2:0 დაწინაურდნენ და მიუხედავად იმისა, რომ მეორე ტაიმის სტარტზე ერთი გოლი გაუშვეს, საბოლოოდ 2:1 მოიგეს და სეზონი კარგად დაიწყეს.
„ლევანტე“ ლა ლიგა 2-ის მეორე ტურის მატჩს 24 აგვისტოს, საკუთარ მოედანზე „კადისის“ წინააღმდეგ ჩაატარებს.
