იტალიურმა „ნაპოლიმ“ გაზარდა შეთავაზება „ჩელსის“ 31 წლის თავდამსხმელის რომელუ ლუკაკუს შესაძენად - წერს ჟურნალისტი ნიკოლო სკირა სოციალურ ქსელ X-ზე (ყოფილი ტვიტერი).

წყაროს ცნობით, ნეაპოლელები მზად არიან ბელგიელისთვის 25 მილიონი ევრო გადაიხადონ. წინა შეთავაზება დაახლოებით 18 მილიონი ევრო გახლდათ.

ხაზგასმულია, რომ ლუკაკუს აქვს პრინციპული შეთანხმება „ნაპოლისთან“ 2027 წლამდე კონტრაქტით, წელიწადში 6,5 მილიონი ევრო ხელფასით + ბონუსები.

გარიგება შეიძლება შეიცავდეს ხელშეკრულების 2028 წლამდე გახანგრძლივების ვარიანტს.

შეგახსენებთ, რომ გასულ სეზონში 31 წლის თავდამსხმელი „რომაში“ იჯარით თამაშობდა. მან მონაწილეობა მიიღო 47 მატჩში ყველა შეჯიბრში, 21 ბურთი გაიტანა და ოთხი საგოლე გადაცემა შეასრულა. ფეხბურთელის ამჟამინდელი შრომითი ხელშეკრულება ლონდონურ კლუბთან 2026 წლის ზაფხულამდეა ძალაში.