„ემპოლის“ მთავარმა მწვრთნელმა დავიდე ნიკოლამ საბა გოგლიჩიძის შესახებ ისაუბრა. როგორც მან თქვა, ქართველი მცველი „ემპოლისთვის“ პერსპექტიული ფეხბურთელია, რომელიც შეძლებს გუნდში დამკვიდრებას.

„ჩვენ ვსაუბრობთ ფეხბურთელზე, რომელიც ბევრი მწვრთნელის გულში დარჩება, მას ყველაფერი აქვს, რომ სპორტსმენი იყოს. ის ძალიან ახალგაზრდაა, ჩვენთან სხვა გამოცდილებით მოვიდა. წარმოიდგინეთ, საქართველოდან ემპოლიში ჩამოსვლა და ინტეგრაცია.

თამაშის გიჟური სურვილი აქვს. ვიფიქრე, რომ შევიყვანდი მოედანზე, სხვა შედეგი რომ ყოფილიყო. „ემპოლისთვის“ ის მნიშვნელოვანი ფეხბურთელი იქნება“, - თქვა ნიკოლამ.

„ემპოლი“ სერია A-ს ბოლო ტურში „ლაციოსთან“ 0:2 დამარცხდა და გოგლიჩიძე სათადარიგო სკამზე იყო. ზოგადად, 19 წლის ფეხბურთელი ტოსკანელთა სამატჩო განაცხადში მუდმივად არის, მაგრამ ჯერჯერობით, მოედანზე არ გასულა და დებიუტის შესაძლებლობა არ ჰქონია.

სერია A-ს დასრულებამდე ორი ტურით ადრე „ემპოლი“ 32 ქულით მე-17 ადგილზეა და ადგილის შესანარჩუნებლად იბრძვის.