ბორჯღალოსნები უკვე ორი დღეა „შევარდენის“ სანაკრებო ბაზაზე წლის პირველ შეკრებაზე იმყოფებიან – ახალი მწვრთნელებითა და 11 დებიუტანტით გაფართოებულ შემადგენლობაში.

ინგლისელ მთავარ მწვრთნელ რიჩარდ კოკერილს, მის ასისტენტებს – ირლანდიელ კონორ მაკფილიპსა და სამხრეთ აფრიკელ შონ სოვერბის, ასევე რამდენიმე მოთამაშეს, სანაკრებო დებიუტი 4 თებერვალს დესაუში, გერმანიასთან ექნებათ. შეხვედრა ჩვენი დროით 18 საათზე დაიწყება.

რიჩარდ კოკერილი: „ვემზადებით გერმანიასთან მატჩისთვის. ამ პროცესში ბევრი რამ ხდება ახალი – ახალ მწვრთნელებთან და მოთამაშეებთან ინტეგრაციის პროცესი საკმაოდ მნიშნელოვანია. გამარჯვება მთავარი პრიორიტეტია და ყოველთვის ამისთვის ვითამაშებთ, თუმცა ამავდროულად, უნდა დავიჭიროთ ბალანსი – მომზადების პროცესი და ახალი მოთამაშეების გამოცდაც მნიშვნელოვანია“.

კონორ მაკფილიპსი (შეტევის მწვრთნელი): „ვგრძნობ, რომ გუნდმა კარგად მიმიღო – როგორც სტაფმა, ისე მოთამაშეებმა. ვხედავ, რომ სწავლის დიდი სურვილი აქვთ. აქ დამხვდა ლევანისა (მაისაშვილი) და ქორის (ბრაუნი) მიერ შექმნილი კარგი ბაზა. მოთამაშეებს აქვთ სასურველი სარაგბო უნარები და ესმით თამაში, თუმცა ისინი ყოველთვის ეძებენ გზებს გახდნენ უკეთესი“.

„ჩემი საქმე და გამოწვევაა მათი განვითარება სხვადასხვა მიმართულებით. საბოლოო მიზანს კი ისეთი თამაშის ჩვენება წარმოადგენს, რომელიც ნებისმიერ დონეზე მოგებაში დაგვეხმარება – არ აქვს მნიშვნელობა როგორი ამინდია, ან როგორი მოწინააღმდეგე გვყავს. მოთამაშეებმა უნდა გაათვითცნობიერონ ამოცანა და შემდეგ მიიღონ სწორი გადაწყვეტილებები წნეხის ქვეშ“.

შონ სოვერბი (დერეფნისა და დაცვის მწვრთნელი): „ჩემი პირველი შთაბეჭდილება დადებითია. ამ გუნდში დიდი ნიჭი და პოტენციალია. ჩვენი სამუშაო იქნება ის, თუ რამდენად კარგად განვავითარებთ ამ პოტენციალს, რათა საქართველო მომავალ წლებში უფრო მაღალ დონეზე ავიყვანოთ. ისტორიულად, შერკინება და მოლი ქართული რაგბის ძლიერი მხარეებია. ჩვენ უნდა დავიბრუნოთ ეს ძალა და პარალელურად, განვვითარდეთ სხვა მიმართულებითაც. უნდა შევძლოთ ქართული ფიზიკურობის დომინაცია მოწინააღმდეგეებზე და თუ ჩვენ ამაზე მუდმივად ვიმუშავებთ, შევძლებთ ტოპ ათეულში შესვლას“.

RUGBY.GE