„იუვენტუსმა“ სერია A-ს მეათე ტურში „ვერონა“, რომლის წინააღმდეგ უდიდეს უპირატესობას ფლობდა, უამრავი საგოლე მომენტი შექმნა, ორი გოლი არ ჩაუთვალეს, ძალიან საკამათო პენალტიც არ დაუნიშნეს, 96-ე წუთზე გატანილი გოლით მოიგო და სატურნირო ცხრილში გალიდერდა.

შესაძლოა, „იუვე“ მხოლოდ ერთი დღით გალიდერდა, რადგან „ინტერს“ და „მილანს“ ამ ტურში ჯერ არ უთამაშიათ, მაგრამ მაინც - ტურინული გრანდი სერია A-ს სატურნირო ცხრილში პირველ ადგილზე 1183 დღის შემდეგაა!

„იუვენტუსი“ ბოლოს იტალიის ჩემპიონატს 2020 წლის პირველ აგვისტოს ლიდერობდა, როდესაც კოვიდის გამო სეზონი ზაფხულში დასრულდა და მაშინ ჩემპიონიც გახდა. მას შემდეგ 3 წელი და თითქმის 3 თვე გავიდა, „იუვე“ კი სერია A-ში პირველად ლიდერობს...

აქვე გეტყვით, რომ „იუვენტუსმა“ 10 ტურში 23 ქულა დააგროვა, ბოლო 5 ტურია გოლი არ გაუშვია, ხოლო 10-დან 7 მატჩში კარის მშრალად შენახვა მოახერხა.