დიდი ხნის შემდეგ ქართული საკალათბურთო გუნდი ევროტურნირზე დაბრუნდა, მაგრამ დაბრუნება წარუმატებელი გამოდგა.

ჩემპიონთა ლიგის კვალიფიკაციის მეოთხედფინალში თბილისი სახელმწიფო უნივერსიტეტის გუნდი ლისაბონის „ბენფიკასთან“ უშანსოდ, 62:122 დამარცხდა.

პორტუგალიელებმა პირველივე პერიოდში 10-ქულიანი უპირატესობა მოიპოვეს და თამაშის ბოლომდე უპირატესობას მხოლოდ ზრდიდნენ, საბოლოოდ კი, 60 ქულით გაიმარჯვეს.

თსუ-ში საუკეთესო გიორგი ტურძილაძე იყო, რომელმაც 19 ქულა და 5 მოხსნა მიითვალა, თუმცა, სხვებმა მას მხარი ვერ აუბეს. 10 ქულა დააგროვა ალექსანდრე ფევაძემ, სხვები ამ ზღვართან არ მისულან.

თსუ ამ მარცხის შემდეგ გადაინაცვლებს ფიბა ევროპის თასზე, სადაც 8 აგვისტოს მიუნხენში გამართულმა წილისყრამ ჯგუფში მეტოქეებად ძალიან ძლიერი გუნდები - ფრანგული „შოლე“, იტალიური „ვარეზე“ და გერმანული „გოტინგენი“ არგუნა. აღნიშნულ ტურნირში თამაშები ოქტომბრის შუა რიცხვებიდან დაიწყება და ჯგუფური ეტაპი (6 მატჩი) 2023 წლის ბოლომდე დასრულდება.

„ბენფიკა“ – თსუ 122:62 (25:15, 32:17, 36:18, 29:12)