ქართველი რეფერი საბა აბულაშვილი 30 ივლისს მსოფლიო რაგბის 20-წლამდელთა ჩემპიონატის ფინალს იმსაჯებს, რომლის გამარჯვებული გაისად ჩემპიონატში აღზევდება.

კენიაში მიმდინარე ალაფის ფინალში ესპანეთი და ურუგვაი გავიდნენ. ჯგუფური ეტაპის დასკვნით შეხვედრაში ორივე მათგანმა ფავორიტად მიჩნეული გუნდი დაამარცხა – ესპანეთმა სამოას 28:10 მოუგო, ხოლო ურუგვაიმ შოტლანდიას 37:26 სძლია და ალაფაზე თამაში ერთი წლით გაუხანგრძლივა. ფინალური შეხვედრა 30 ივლისს, საქართველოს დროით 17 საათზე დაიწყება.

„ძალიან საინტერესო ტურნირი გამოვიდა. ურუგვაი და ესპანეთი პირველად არიან ალაფის ფინალში და შესაბამისად, გამარჯვებული გაისად ჩემპიონატის დებიუტანტი იქნება. მე ტურნირზე პირველ ტურში, სამოასა და კენიას (34:25) შეხვედრა ვიმსაჯე, რომელიც რთული გამოდგა. ხშირი იყო ჯარიმები, უხეშობები და 5-ჯერ მომიწია ბარათის გამოყენება (ვიდეო-რეფერის გარეშე). ეს თამაში ძალიან კარგად შეფასდა, შემდეგი ორი ტური გვერდითი მსაჯი ვიყავი, ახლა კი ფინალში ვბრუნდები მოედნის მსაჯად“.

„ესპანეთი და ურუგვაი თანაბარი დონის გუნდებია და ვფიქრობ დაძაბული და საინტერესო ფინალი იქნება. ჩემთვის მნიშვნელოვანია, რომ ამოცანას კარგად გავართვა თავი, რათა შემდგომში კიდევ უფრო მაღალი დონის დანიშვნები მივიღო“ – აღნიშნავს აბულაშვილი, რომელმაც დიდი 10-ის გასული სეზონის ფინალიც იმსაჯა და იმედოვნებს, რომ გაისად 20-წლამდელთა ჩემპიონატიდან მიიღებს მიწვევას.

rugby.ge