„სამხრეთ ამერიკაში განსხვავებულ მოწინააღმდეგეებთან განსხვავებული თამაშები გვაქვს. გუნდებს არ ვიცნობთ, რაც ერთგვარი გამოწვევა და X ფაქტორია“ – ამბობს ‘შავი ლომის’ მთავარი მწვრთნელი ლევან მაისაშვილი, რომლის გუნდმა მონტევიდეოში (ურუგვაი) უკვე მოიპოვა ორი გამარჯვება.

პირველ შეხვედრაში ‘შავმა ლომმა’ არგენტინულ ‘დოგოს XV’-ს 11 ლელო გაუტანა და 75:19 დაამარცხა.

„პირველი მეტოქე შედარებით სუსტი აღმოჩნდა, თუმცა მხოლოდ ანგარიშით დასკვნებს არ გავაკეთებდი. მე მქონდა საუბარი ‘დოგოსის’ მწვრთნელებთან. მათ რამდენიმე ტრავმირებული მოთამაშე ყავდათ. თუ გადავხედავთ ჩვენს შემადგენლობას, პირველი ნომრები ჩვენც საკმარისად დავასვენეთ. პირველი ტაიმი ძალიან კარგად ჩავატარეთ. ყველა შესაძლებლობა, რაც გვქონდა გამოვიყენეთ და მოწინააღმდეგე ადვილად გავტეხეთ. ერთი მეორეზე უკეთესი ტაქტიკური ლელოები გავიტანეთ, რაც დასაფასებელია. იყო მოულოდნელობის ეფექტიც. რამდენიმე ლელო ისე გავიტანეთ, მეტოქეს გონზე მოსვლის საშუალება არ მივეცით. შესვენების შემდეგ ორივე გუნდში ბევრი ცვლილება განხორციელდა. არგენტინელებმა პირველი ნომრები შემოიყვანეს და თამაში ოდნავ გათანაბრდა“ – აჯამებს პირველ თამაშს მაისაშვილი.

მეორე თამაში ჩილეს ‘სელკნამთან’ გვქონდა, რომელიც პრაქტიკულად ჩილეს ნაკრებია. 2023 წლის მსოფლიო თასის შესარჩევ ეტაპზე, ჩილემ სამხრეთ ამერიკაში ურუგვაის შემდეგ მეორე ადგილი დაიკავა, ორმატჩიან ფლეი ოფში ჯერ კანადას აჯობა ჯამში 54:46 (21:22, 33:24), მერე აშშ-ს 52:51 (21:22, 31:29) და ისტორიაში პირველად მოიპოვა მსოფლიო თასის საგზური.

‘შავმა ლომმა’ კარგი პირველი ტაიმი ჩაატარა და მეორე ნახევრის დასაწყისში 18 ქულით, 28:10 დაწინაურდა. მაგრამ ‘სელკნამი’ არ გატყდა და დასკვნით წუთებში გატანილი ჯარიმით დაწინაურდა. კაცნაკლულმა ქართველებმა ბოლოსწინა წუთზე მაინც შეძლეს გამარჯვების მომტანი ლელოს გატანა – 33:30. ამ თამაშის შესახებ მაისაშვილი ამბობს:

„მეორე თამაში პრაქტიკულად ჩილეს ნაკრების წინააღმდეგ გვქონდა. ‘სელკნამის’ სამწვრთნელო შტაბი ჩილეს ნაკრების სამწვრთნელო შტაბია და მათ ეს შეხვედრა ტესტ-მატჩად გამოიყენეს, რადგან ‘შავი ლომიც’ დიდწილად საქართველოს ნაკრების მორაგბეებითაა დაკომპლექტებული. ‘სელკნამის’ განაცხადში 19 ისეთი მოთამაშე იყო, რომლებმაც აშშ-სთან ისტორიული გამარჯვება მოიპოვეს. ‘სელკნამი’ სუპერ ლიგაში ასეთი შემადგენლობით არ თამაშობს ხოლმე“.

„მეტოქე მაქსიმალურად მობილიზებული გვეთამაშა და კარგი ტესტი გამოგვივიდა. ის ‘დოგოსისგან’ ტაქტიკურად განსხვავებულ რაგბს თამაშობდა. შეცვლების რაოდენობა აქაც არასტანდარტული იყო. მიუხედავად იმისა, რომ მსაჯის გადაწყვეტილებები მთელ რიგ ეპიზოდებში საეჭვო იყო, გვქონდა დისციპლინის პრობლემები. რაღაც ეპიზოდებში პრევენცია შეიძლებოდა და აუცილებლად გვექნება ანალიზი. და მაინც, ასეთ წნეხში თამაშიც გამოცდილებაა. კარგია, რომ კაცნაკლულებმა გამოვნახეთ ძალა და შევძელით პასუხი გაგვეცა როგორც მოწინააღმდეგისთვის, ასევე მსაჯისთვის. მიუხედავად იმისა, რომ მსაჯმა 4 ყვითელი ბარათი მოგვცა და ფაქტობრივად უბურთოდ დაგვტოვა, სიტუაციას ბოლომდე ვაკონტროლებდით. დასაფასებელია ისიც, რომ მეტოქე არ გატყდა და ბოლომდე იბრძოლა, რაც ჩილესთვის დამახასიათებელია“.

გარდა თამაშებისა, ‘შავმა ლომმა’ მონტევიდეოში ურუგვაის ფრენჩაიზთან ‘პენიაროლთან’, რომელიც ფაქტობრივად ურუგვაის ნაკრების ბირთვს წარმოადგენს, ერთობლივი ვარჯიში გამართა. ასეთი ერთობლივი წვრთნა მომავალ კვირაშიც იგეგმება, მანამდე კი, ოთხშაბათს, ‘შავი ლომი’ გემით არგენტინაში გადავა და ბუენოს აირესში ადგილობრივ ‘პამპასს’ ჩვენი დროით 22 აპრილს, ღამის პირველ საათზე ერკინება. პატარ-პატარა ტრავმების გამო, ‘შავ ლომს’ მომავალ შეხვედრაში რამდენიმე მოთამაშე დააკლდება.

RUGBY.GE