„მილანის“ ტექნიკურმა დირექტორმა პაოლო მალდინიმ ჩემპიონთა ლიგასა და „ნაპოლისთან“ მატჩებზე ისაუბრა. ლეგენდარული იტალიელი ფეხბურთელი ფიქრობს, რომ „როსონერის“ ჩემპიონთა ლიგის მოგება შეუძლია.

„წილისყრის შემდეგ ანჩელოტიმ დამირეკა და მკითხა: „პაოლო, სტამბოლში გნახავ, ხომ? (ჩემპიონთა ლიგის ფინალი სტამბოლშია, „მილანისა“ და რეალის“ გზები კი ფინალამდე არ იკვეთება - რედ). ეს ადვილი არ იქნება, მაგრამ ვფიქრობ, კლუბის ისტორია გვაძლევს ამის დაჯერების უფლებას. ეს ადრეც მომხდარა: როდესაც მარტ-აპრილში შეგიძლია სეზონი რაღაც წარმოუდგენლად აქციო. ჩვენ გვაქვს ეს შანსი და გვინდა გამოვიყენოთ. იოლი არ იქნება, მაგრამ ოცნება გვიყვარს. ოცნების გარეშე ჩვენ ალბათ ნაკლებ ჩემპიონთა ლიგას მოვიგებდით.

დღევანდელ შემადგენლობაშიც ბევრი მეოცნებე გვყავს და კარგია, რომ ისინი არსებობენ, ისევე, როგორც არსებობენ უფრო რეალისტი ადამიანებიც. მეც მეოცნებე ვიყავი, როცა ვთამაშობდი, მიყვარდა ოცნება, განსაკუთრებით „მილანში“, ამის გარეშე ალბათ, მეც ნაკლებ ჩემპიონთა ლიგას მოვიგებდი“, - თქვა მალდინიმ.

შეგახსენებთ, რომ „მილანი“ და „ნაპოლი“ ერთმანეთს 12-18 აპრილს დაუპირისპირდებიან.