ფიფამ ლეგენდარულ ბრაზილიელ თავდამსხმელს, აწგანსვენებულ პელეს, საგანგებო ჯილდო გადასცა, რომელსაც „სამუდამოდ საუკეთესო“ ჰქვია.

საფეხბურთო ორგანიზაციამ ბრაზილიის ნაკრების შემადგენლობაში მსოფლიოს სამგზის ჩემპიონის ხსოვნას პატივი მიაგო. საპატიო ჯილდო ფეხბურთელის მეუღლემ, მარსია აოკიმ ჩაიბარა ლეგენდარული რონალდოსგან.

ფიფას ოფიციალურ ვებ-საიტზე მითითებულია, რომ პელემ კარიერის განმავლობაში 1281 ბურთი გაიტანა. ორგანიზაცია არ ცნობს ორ გოლს, რომელიც „მეფემ“„სანტოსის“ საჩვენებელ მატჩში შეაგდო, ამ დროს მას კარიერა უკვე დაემთავრებინა. გინესის რეკორდების წიგნში კი მითითებულია, რომ ბრაზილიელმა კიდევ ორი ​​ბურთით ნაკლები - 1279 გაიტანა.

ფეხბურთის მეფე ბოლო წლებში მსხვილი ნაწლავის პროგრესირებად კიბოს ებრძოდა. დაავადება მას 2021 წლის შემოდგომაზე დაუდგინდა, რის შემდეგაც 82 წლის ბრაზილიელს ქიმიოთერაპია უტარდებოდა.

მაგრამ შემდგომ სხეულმა პრეპარატებზე რეაგირება შეწყვიტა. მისი მდგომარეობა თანდათან გაუარესდა და 2022 წლის 29 ნოემბერს საავადმყოფოში გადაიყვანეს მკურნალობის კურსის გასაგრძელებლად. ერთი თვის შემდეგ პელე გარდაიცვალა.