NBA-ის ყველა ვარსკვლავის უიქენდი ახლოვდება, ღონისძიებები 17 თებერვლიდან დაიწყება, მთავარი მატჩი კი 19-ში გაიმართება. დღეს სხვადასხვა ღონისძიებებში მონაწილე კალათბურთელების ვინაობაც გაირკვა.



როგორც წესი, პარასკევი დღე ახალწვეულების მატჩს ეთმობა ხოლმე, შაბათს კი Skills Challenge, ჩატენვების კონკურსი და სამქულიანების კონკურსი იმართება.

ცნობილი გახდა, რომ Skills Challenge-ს კონკურსში მონაწილეობას 3 გუნდი: ანტეტოკუნმპოების გუნდი, „ჯაზის“ გუნდი და ახალწვეულების გუნდი მიიღებს.

ანტეტოკუნმპოების გუნდში მთავარი ვარსკვლავი იანისი ძმებთან, ტანასის და ალექს ანტეტოკუნმპოებთან ერთად გამოვა. „ჯაზის“ გუნდს მასპინძელი გუნდის წარმომადგენლები, ჯორდან კლარკსონი, უოლკერ კესლერი და კოლინ სექსტონი წარმოადგენენ. ახალწვეულების გუნდში კი პაოლო ბანკერო (ორლანდო მეჯიქი), ჯეიდენ აივი (დეტროიტ პისტონსი) და ჯაბარი სმიტ ჯრ. (ჰიუსტონ როკეტსი) იქნებიან. ღონისძიება 3 რაუნდისგან შედგება და გუნდი, რომელიც ყველაზე მეტ ჩელენჯ ქულას დააგროვებს, ჩემპიონი გახდება.

3-ქულიანების კონკურსში ტრადიციულად, 8 მონაწილე მიიღებს მონაწილეობას: ტაირეზ ჰალიბარტონი (ინდიანა პეისერსი), ტაილერ ჰიროუ (მაიამი ჰითი), ბადი ჰილდი (ინდიანა პეისერსი), კევინ ერტერი (საკრამენტო კინგსი), დეიმიან ლილარდი (პორტლენდ ტრეილ ბლეიზერსი), ლაური მარკანენი (იუტა ჯაზი), ანფერნი საიმონსი (პორტლენდ ტრეილ ბლეიზერსი) და ჯეისონ ტეიტუმი (ბოსტონ სელტიქსი). ეს ღონისძიებას 3 რაუნდისგან იქნება შემდგარი. ფინალურ რაუნდში 3 მონაწილე იასპარეზებს და გამარჯვებულიც იქ გამოვლინდება.

რაც შეეხება ჩატენვების კონკურსს, აქ 4 სპორტსმენი გვყავს: კეი ჯეი მარტინი (ჰიუსტონ როკეტსი), მაკ მაკლანგი (ფილადელფია სიქსერსი), ტრეი მერფი III (ნიუ ორლეანს პელიკანსი), ჯერიკო სიმსი (ნიუ იორკ ნიქსი) - როგორც ხედავთ ბოლო წლების სამწუხარო ტრადიცია შენარჩუნდა და ამ ღონისძიებაში არც თუ ისე ცნობილმა სახეებმა გადაწყვიტეს მონაწილეობის მიღება.

NBA ALL STAR 2023 17-დან 19 თებერვლის ჩათვლით სოლტ ლეიქ სითიში გაიმართება.