მადრიდის „რეალის“ მთავარმა მწვრთნელმა კარლო ანჩელოტიმ „ალ ჰილალთან“ გამარჯვების (5:3) და საკლუბო მსოფლიოს ჩემპიონატის მოგების შემდეგ კომენტარი გააკეთა.

მან მადლობა გადაუხადა ფედერიკო ვალვერდეს, რომელმაც გოლი გაიტანა. საქმე ისაა, რომ სეზონის წინ ანჩელოტიმ თქვა: „თუ ამ სეზონში ვალვერდე 10 გოლს არ გაიტანს, სამწვრთნელო ლიცენზიას დავხევ“. ურუგვაელი ფეხბურთელისთვის „ალ ჰილალთან“ გოლი სეზონში მეათე იყო.

„მატჩიდან მატჩამდე ვუმჯობესდებით, მაგრამ ჯერ კიდევ უნდა გვახსოვდეს, ზუსტად რა შეცდომები დავუშვით წინა მატჩებში. ვალვერდეს მადლობელი ვარ, რადგან კარიერის დასრულების საშუალება არ მომცა. მას ძალიან რთული პერიოდი ჰქონდა, მაგრამ ახლა ბევრ ვარიანტს გვთავაზობს და მარჯვენა ფლანგზე თამაშიც შეუძლია.

მიხარია, რომ ფეხბურთი სხვადასხვა ქვეყნებში უმჯობესდება. ევროპული ფეხბურთი კვლავ საუკეთესოა, მაგრამ დანარჩენი სამყაროც სწრაფად პროგრესირებს“, - თქვა ანჩელოტიმ.