ხორვატიის ნაკრების მთავარმა მწვრთნელმა ზლატკო დალიჩმა არგენტინასთან მატჩამდე პრესკონფერენცია გამართა. როგორც მან თქვა, ეს შეიძლება ხორვატული ფეხბურთის ისტორიაში ყველაზე მნიშვნელოვანი თამაში გახდეს.

„არგენტინა დიდი გუნდია, მაგრამ მეტოქეს არ მოვერგებით, ჩვენს თამაშს ვითამაშებთ. დამატებითი დროის ორჯერ თამაში მოგვიწია და ბევრი ენერგია დავხარჯეთ. თუმცა, არ ვსაუბრობთ იმაზე, გვაქვს თუ არა ძალა - გვაქვს ძალა, ენერგია და სურვილი. ყველას გავაკეთებთ, როგორც ყველა თამაშში ვაკეთებდით. ვიცით, რამდენი ენერგია დაგვჭირდება, ამისთვის მზად ვართ. პრობლემები არ გვაქვს, ყველა ფეხბურთელი ჯანმრთელია.

4 წლის წინ არგენტინასთან კარგად ვითამაშეთ, მაგრამ ეს განსხვავებული თამაშია და იმ თამაშისგან განსხვავდება. ორივე გუნდი მაქსიმუმს გაიღებს, ამიტომ კარგ და ხარისხიან მატჩს ველოდები. დიდი ემოციებია, ვუყურეთ ნიდერლანდებთან მატჩს და ბევრი არასაფეხბურთო სიტუაცია იყო. გვინდა, რომ მსგავსი რამ თავიდან ნებისმიერ ფასად ავიცილოთ.

ჩემთვის ყველაზე დიდი თამაში არის ნახევარფინალი ინგლისთან, როცა ფინალში გავედით, მაგრამ ხვალ შეიძლება იყოს კიდევ უფრო დიდი და კიდევ უფრო მნიშვნელოვანი. თუ გავიმარჯვებთ, ჩემთვის ეს იქნება ხორვატიის ნაკრების ისტორიაში ყველაზე დიდი მატჩი.

ნიდერლანდებისა და არგენტინის მატჩი გავაანალიზეთ. მესი კვლავ შესანიშნავ ფორმაშია და შეუძლია თამაშის გადაწყვეტა და თანაგუნდელების მხარდაჭერა აქვს. ისინი მოქმედებენ როგორც შესანიშნავი და კარგად ორგანიზებული გუნდი. მე კიდევ უფრო ძლიერ გუნდს ველოდები, ვიდრე ეს იყო ნიდერლანდების წინააღმდეგ. ჩვენზე მეტი ზეწოლაცაა. ბევრი გულშემატკივარი იქნება, რაც ჩვენთვის პლუსიც არის და მინუსიც. ოღონდ არ უნდა ვიწუწუნოთ, უნდა გავიდეთ და ფეხბურთით ვისიამოვნოთ.

მე ვთქვი, რომ ცხოვრებაში ყველას აქვს ოცნების უფლება. ოთხი წლის წინ ხორვატიამ ყველა ბავშვს მისცა ოცნების უფლება. მაშინ არავინ ელოდა, რომ პატარა ხორვატია ფინალში იქნებოდა. შემდეგ კი, ჩვენი მაგალითით შთაგონებული, სხვა ნაკრებები ისრულებენ თავიანთ ოცნებებს, მათ შორის მაროკოც. მათ აქვთ უფლება ფინალში გასვლის იმედი ჰქონდეთ, ისევე როგორც ჩვენ გვაქვს ამის უფლება.

ორივე ეროვნულ გუნდს დიდი ემოცია აქვს. მომხიბლავია, როგორ გულშემატკივრობენ არგენტინელი გულშემატკივრები. ჩვენც ასე ვართ, მაგრამ არგენტინელებზე ბევრად ნაკლები ვართ. ყოველთვის ვეუბნები მოთამაშეებს, რომ ისიამოვნონ ფეხბურთით, რადგან არ არის წარმატება, თუ შენი საქმის კეთება არ გსიამოვნებს. ჩვენ ყველანი დიდი ხალისით ვმუშაობთ და კიდევ ვეტყვი, რომ ისიამოვნონ. ოთხეულში გავედით, ალბათ ამას არ ველოდით. მთელი მსოფლიო უყურებს ხორვატიის თამაშს.

ვერც კი წარმოვიდგენდი, რომ როგორც ხორვატიის მწვრთნელი გუნდს ორ ნახევარფინალში გავუძღვებოდი. უფრო მეტიც, მეგონა, რომ ხორვატიის მწვრთნელობა სხვა ადამიანების საქმე იყო და არა ჩემი. ხვალ რაც არ უნდა მოხდეს, ვამაყობ. ბედნიერი და ამაყი ვარ. ვოცნებობდი ხორვატიის ნაკრების გაწვრთნაზე, მაგრამ ასეთი დიდი ოცნებები არ მქონია და ამისთვის მადლობა ღმერთს“, - თქვა დალიჩმა.

შეგახსენებთ, ხორვატიისა და არგენტინის ნაკრებთა მატჩი 13 დეკემბერს, თბილისის დროით 23:00 საათზე გაიმართება.