ესეც პირველი ხმაურიანი სენსაცია მუნდიალზე - ჩემპიონობის ერთ-ერთმა მთავარმა ფავორიტმა, არგენტინამ, ტურნირის მაჩანჩალა საუდის არაბეთთან 1:2 წააგო...

თუმცა, მაჩანჩალას ამიერიდან ალბათ ვეღარავინ იტყვის. 54 წლის ფრანგი სპეციალისტის, ერვე რენარის გუნდმა სამხრეთამერიკელებს დამსახურებულად მოუგო. საუდელებმა არგენტინელებს ტაქტიკურადაც აჯობეს, თამაშითაც და განწყობითაც. ოსტატურად იცავდნენ თავს, შეცდომებს თითქმის არ უშვებდნენ. მეორე ტაიმის დასაწყისში კი ხუთწუთიან მონაკვეთში ორი ბურთი გაუტანეს და სატურნირო მდგომარეობა ერთობ გაურთულეს.

არგენტინელების მიმართ ინტერესს ისიც აღვივებს, რომ მათი დიდვარსკვლავი, ლიონელ მესი მეხუთე და ალბათ ბოლო მუნდიალს ატარებს და ტიტული ჯერაც ვერ მოუგია.

2014 წელს მესის კაპიტნობით, „ალბისელესტე“ ახლოს იყო მიზანთან, მაგრამ ფინალში, დამატებით დროში გერმანისთან წააგო (0:1)

ამჯერად მესის მეხუთე ცდა აქვს.

საუდელებმა პირველ ტაიმშიც ღირსეული წინააღმდეგობა გაუწიეს მრისხანე მეტოქეს - 0:1 სულაც არ იყო სამარცხვინო ანგარიში. თუმცა ისიც სათქმელია, რომ არგენტინელებს სამი გოლი არ ჩაუთვალეს, სამივე თამაშგარეს მიზეზით. ჯერ მესის, შემდეგ კი ორჯერ ლაუტარო მარტინესს.

მანამდე ლეომ პენალტით გახსნა ანგარიში. არაბებმა საკუთარ საჯარიმოში პარედესი წააქციეს და ვარ-ის ჩარევის შემდეგ სლოვენიელმა არბიტრმა თერთმეტმეტრიანი დანიშნა, რომელიც ზუსტად დაარტყა მესიმ.

მერე კი, რაც მოხდა თავში ვთქვით.

არგენტინა - საუდის არაბეთი 1:2

ლუსაილი. „ლუსაილი“

1:0 მესი (10 პენ), 1:1 ალ-შეჰრი (48), 1:2 ალ-დავსარი (53)

არგენტინა: მარტინესი, მოლინა, ოტამენდი, რომერო (ლისანდრო მრტინესი 59), ტალიაფიკო (აკუნია 71), პარედესი (ფერნანდესი 59), დე პაული, გომესი (ალვარესი 59), მესი, დი მარია, ლაუტარო მარტინესი

მწვრთნელი: ლიონელ სკალონი

საუდის არაბეთი: ალ-უვაისი, ალ-ტამბაკტი, აბდულჰამიდი, ალ-შაჰრანი, ალ-ბულაიჰი, ალ-მალკი, ალ-დავსარი, ალ-შეჰრი (ალ-ღანამი 78), კანო, ალ-ფარაჯი (ალ-აბიდი 45+4, ალ-ამრი 88), ალ-ბრიკანი (ასირი 89)

მწვრთნელი: ერვე რენარი

მსაჯი: სლავკო ვინჩიჩი (სლოვენია)

გაფრთხილება: ალ-მალკი (67), ალ-ბულაიჰი (75), ალ-დავსარი (79), აბდულჰამიდი (82), ალ-აბიდი (88), ალ-უვაისი (90+2)

სტატისტიკა - კარისკენ დარტყმები: 6-2, ბურთის ფლობა: 69-31, კუთხურები: 9-2, თამაშგარე: 10-1