მანუ სამოა საქართველოს მეოთხედ ეწვევა და 12 ნოემბერს ბორჯღალოსნებთან ისტორიაში მეექვსედ ითამაშებს. წლის ბოლო საშინაო შეხვედრა „დინამო არენაზე“ 18 საათზე დაიწყება.
სამოას კუნძულებზე რაგბის თამაში 1920 წელს დაიწყეს, მალე ნაკრებიც შეიქმნა და 1924 წელს ფიჯისთან პირველი შეხვედრა გამართა. სამოელებმა ყველაზე დიდი სხვაობით 2009 წელს პაპუა-ახალი გვინეასთან მოიგეს (115:7), თავად კი ერთი წლით ადრე ახალ ზელანდიასთან დამარცხდნენ (14:101).
სიძლიერიდან გამომდინარე, მათ ხშირად უწევდათ წამყვან სარაგბო ქვეყნებთან თამაში და 1991-2014 წლებში რამდენიმე ხმაურიანი გამარჯვებაც მოიპოვეს – 5-ჯერ იტალიასთან (7 თამაშიდან), 4-ჯერ უელსთან (10 თამაშიდან), 3-ჯერ არგენტინასთან (4 თამაშიდან), თითო-თითოჯერ ავსტრალია, ირლანდია და შოტლანდიასთან.
1991 წლიდან დღემდე, სამოამ ყველა – 8-ვე მსოფლიო თასზე ითამაშა და ორჯერ მეოთხედფინალშიც გავიდა (1991, 1995). 2023 წლის მსოფლიო თასის საგზური კუნძულელებმა ოკეანეთი1-ის სახელით მოიპოვეს და საფრანგეთში დ ჯგუფში, ინგლისთან, იაპონიასთან, არგენტინისა და ჩილესთან მოხვდნენ.
ზაფხულში სამოელებმა წყნარი ოკეანის თასზე ავსტრალია ბ, ტონგა და ფიჯი დაამარცხეს და ტიტულის მფლობელები გახდნენ. საქართველოში ჩამოსვლამდე ისინი იტალიას ეწვივნენ და 17:49 დამარცხდნენ. შედეგად, სამოა მსოფლიო რეიტინგში 74,33 ქულით მე-14 ადგილზე დაქვეითდა. საქართველო 74,51 ქულით მე-13 პოზიციაზეა. მას 0,20 ქულით უსწრებს იტალია და 0,33-ით ფიჯი. ამრიგად, თუ ბორჯღალოსნები 12 ნოემბერს „დინამო არენაზე“ მოიგებენ, ხოლო იტალია (ავსტრალიასთან) და ფიჯი (ირლანდიასთან) დამარცხდებიან, ბორჯღალოსნები სარეკორდო მე-11 ადგილზე დაწინაურდებიან.
ტრადიციულად, სამოელები თამაშის წინ ასრულებენ საბრძოლა ცეკვა სივა-ტაუ-ს, რაც მეტოქის მიმართ პატივისცემის გამოხატულებაა.
ჩვენ და სამოა
ბორჯღალოსნებს სამოას წინააღმდეგ 5-ჯერ უთამაშია და მეტოქესთან დადებითი ბალანსი აქვს – 3 მოგება, 1 ფრე და 1 მარცხი, ისიც 19 წლის წინ, 2003 წლის სადებიუტო მსოფლიო თასზე პერთში 9:46. მას შემდეგ 10 წელი ველოდეთ კუნძულელებთან ტესტ-მატჩს და 2013 წელს, იმ დროისთვის უძლიერეს სამოას თბილისში 16:15 ვაჯობეთ.
2016 წელს წყნარი ოკეანის კუნძულებზე ტურნეზე მყოფმა ბორჯღალოსნებმა მეტოქესთან ფრედ 19:19 ითამაშეს. იმავე წელს სამოა თბილისში მივიღეთ და 20:16 დავამარცხეთ, ბოლოს კი 2018 წელს „ავჭალაზე“ ვუმასპინძლეთ და დიდი ჩამორჩენის მიუხედავად, საბოლოოდ 27:19 გავიმარჯვეთ. სამოელებს 3-ჯერ ვეთამაშეთ თბილისში – ორჯერ ვაკეში და ერთხელ ავჭალაში, წელს კი პირველად ვერკინებით „დინამო არენაზე“.
2003 წლის მატჩის შედეგად, გატანილ და გაშვებულ ლელოებსა და ქულებში მეტოქე ლიდერობს. სამოასთვის საქართველოს გატანილი აქვს 7 ლელო და მიღებული 13, ხოლო ქულების თანაფორდობა 91:115-ზეა.
მსოფლიო რაგბის მიერ წესებში შეტანილი ცვლილების შემდეგ, თბილისში ორი სამოელი „ოლ ბლექსი“ მოდის – სტევენ ლუატუა, რომლის ანგარიშზე ახალი ზელანდიის კვართით 15 მატჩია და ჯეფრი ტოომაგა-ალენი (1 კეპი). გუნდშია დუნკან პაია’აუა, რომელიც ავსტრალიის ნაკრებში იყო გამოძახებული, თუმცა დებიუტმა არ მოუწია.
RUGBY.GE
