კრიშტიანუ რონალდუ „მანჩესტერ იუნაიტედის“ დატოვებას ცდილობს, მიუხედავად იმისა, რომ ეს ცნობა ერიკ ტენ ჰაგმა არაერთხელ უარყო.
ესპანური გაზეთი As-ი იტყობინება, რომ პორტუგალიელი ფეხბურთელი მისმა გარემოცვამ მადრიდის „ატლეტიკოს“ შესთავაზა. წყაროს თანახმად, დიეგო სიმეონე, რომელიც კრიშტიანუსთან კარგი ურთიერთობით არასდროს გამოირჩეოდა, ამ ტრანსფერის წინააღმდეგი არ არის, თუმცა, ამ ეტაპზე რონალდუს მადრიდულ გუნდში გადასვლა ძალიან რთული იქნება.
როგორც ესპანური გამოცემა წერს, „ატლეტიკოს“ ამჟამად არ გააჩნია ფინანსური რესურსი საიმისოდ, რომ რონალდუს სახელფასო მოთხოვნები დააკმაყოფილოს.
შეგახსენებთ, რომ კრიშტიანუმ გასულ სეზონში „მანჩესტერის“ მაისურით 38 მატჩში 24 გოლი გაიტანა. მას ინგლისურ კლუბთან კონტრაქტი მომდევნო ზაფხულამდე აკავშირებს.
