ესპანეთის ლა ლიგამ „პარი სენ ჟერმენს“ კილიან მბაპესთან კონტრაქტის განახლების გამო უეფაში უჩივლა. ლა ლიგის ოფიციალურ ვებგვერდზე განცხადება გამოქვეყნდა.

„კილიან მბაპეს „პარი სენ ჟერმენში“ დარჩენის გამო, ლა ლიგას სურს განაცხადოს, რომ ამ ტიპის შეთანხმება საფრთხეს უქმნის ევროპული ფეხბურთის ეკონომიკურ მდგრადობას. ფეხბურთს საშუალოვადიან პერსპექტივაში საფრთხე ემუქრება. სკანდალურია, რომ პსჟ-ს მსგავსი კლუბი, რომელმაც გასულ სეზონში 220 მილიონ ევროზე მეტი დაკარგა, ბოლო სეზონებში კი 700 მილიონი ევროს ზარალი ჰქონდა, ასეთ შეთანხმებას აღწევს ფეხბურთელთან. ამიტომაც, ლა ლიგა უეფაში პსჟ-ში წინააღმდეგ საჩივარს შეიტანს, რათა გააგრძელოს ევროპული ფეხბურთის ეკონომიკური სისტემის დაცვა და მისი მდგრადობა“, - ნათქვამია განცხადებაში.

შეგახსენებთ, რომ კილიან მბაპემ „პარი სენ ჟერმენთან“ კონტრაქტი 2025 წლამდე გააფორმა. არაოფიციალური ინფორმაციით, მბაპეს ხელფასი სეზონში 50 მილიონი ევრო იქნება, ხოლო კონტრაქტის განახლებისთვის ბონუსის სახით 100 მილიონი ევროც მიიღო.