ამსტერდამის „აიაქსის“ მცველი ნუსაირ მაზრაუი კარიერას „ბაიერნში“ გააგრძელებს. ამის შესახებ ინფორმაცია ფაბრიციო რომანომ გაავრცელა.

ცნობილი ინსაიდერი წერს, რომ 24 წლის მაროკოელმა ფეხბურთელმა გერმანულ გრანდში უკვე სამედიცინო შემოწმებაც გაიარა და კონტრაქტიც გააფორმა, ტრანსფერის შესახებ ოფიციალური განცხადება კი უახლოეს მომავალში გაკეთდება. მანამდე აფრიკელი ფეხბურთელი სეზონის „აიაქსში“ დასრულებაზეა კონცენტრირებული.

როგორც რომანო იტყობინება, ტრანსფერში ყველაზე დიდი წვლილი ოლივერ კანმა და იულიან ნაგელსმანმა შეიტანეს, რომლებიც ფეხბურთელს პირადად ესაუბრნენ, ფინანსური დეტალები კი ჯერ უცნობია. იტალიელი ჟურნალისტი ასევე წერს, რომ „ბაიერნის“ შემდეგ ტრანსფერი „აიაქსის“ კიდევ ერთი ფეხბურთელი, რაიან გრავენბერხი იქნება.

შეგახსენებთ, ნუსაირ მაზრაუი „აიაქსში“ 2017 წლიდან თამაშობს და 136 მატჩში 10 გოლი აქვს გატანილი.