საქართველოს მორაგბეთა ნაკრების კაპიტანმა მერაბ შარიქაძემ ესპანეთთან მატჩის (49:15) შემდეგ კომენტარი გააკეთა. მისი განცხადებით, წინა მატჩების შემდეგ დიდი კრიტიკა მიიღეს და ამიტომ, სურდათ, რომ გულშემატკივარი გაეხერებინათ.

„კარგად ვითამაშეთ და ამჯერად ვერავინ მოგვედავება. წინა თამაშების შემდეგ დიდი კრიტიკა მივიღეთ და ძალიან გვინდოდა გულშემატკივარი გაგვეხარებინა. იმედი გვაქვს, რომ ყველა გავახარეთ და მსგავსი გამარჯვებები მომავალშიც არაერთი იქნება. ესპანეთი ამ ტურნირზე შექებას იმსახურებს, თუმცა შექება ჩვენც გვეკუთვნის. დღეს მთელი გუნდით ამაყი ვარ, რადგან არ არის მარტივი, ამდენი ნეგატივის შემდეგ მობილიზება მოახერხო და სასურველი თამაში აჩვენო.

რაც ნაკრებში ვარ სულ მესმის, რომ ხაზი ვერ თამაშობს და ყველა გასაყრელია ნაკრებიდან. დავიწყეთ ხაზით თამაში. ისე არ მინდა გამომივიდეს, რომ ძალიან მაგრები ვართ, მაგრამ ფაქტია უკეთ ვთამაშობთ და არსად შემხვედრია კომენტარი – რა კარგია რუმინეთს ხაზით ოთხი ლელო რომ გავუტანეთ. საყვედურს არავის ვეუბნები, მაგრამ საწყენია მუდმივი კრიტიკა. გაგვიხარდებოდა შექება და მოტივაციაც აგვიმაღლდებოდა. ვეცდებით ჩვენი კარგი თამაშით კრიტიკოსებს დავუმტკიცოთ, რომ უკეთესები ვართ ვიდრე მათ გონიათ", - თქვა შარიქაძემ.

შეგახსენებთ, რომ საქართველოს ნაკრებმა ესპანეთი 49:15 დაამარცხა და რაგბი ევროპის ჩემპიონი გახდა. "ბორჯღალოსნებს" მსოფლიოს 2022 წლის ჩემპიონატის საგზური მანამდეც მოპოვებული ჰქონდათ.