„პარი სენ ჟერმენის“ ფეხბურთელმა კილიან მბაპემ მადრიდის „რეალთან“ (1:0) გამარჯვების შემდეგ ისაუბრა. როგორც ფრანგმა ფეხბურთელმა აღნიშნა, საპასუხო შეხვედრა განსხვავებული იქნება და ამისთვის უნდა მოემზადონ.

მადრიდელთა კარში გამარჯვების გოლის ავტორმა ისიც თქვა, რომ ამ მატჩის გარეშეც იცოდა, მსოფლიოს ერთ-ერთ საუკეთესო გუნდში რომ თამაშობდა.

„ბედნიერი ვარ, ძალიან კარგად ვითამაშეთ და მეორე მატჩის წინ უპირატესობა ჩვენს მხარესაა. ნეიმარმა პასი მომცა და შევძელი საჯარიმოში სწრაფად შეჭრა, მცველები ჩამორჩნენ და ზუსტად ვიცოდი, რომ მეკარისთვის ფეხებს შორის უნდა დამერტყა. მადრიდის „რეალის“ მსგავსი გუნდი არასდროს ნებდება, ამ მატჩში შედეგს ვერ მიაღწია, მაგრამ საპასუხო შეხვედრაში სხვანაირად იმოქმედებს და 9 მარტისთვის უნდა მოვემზადოთ.

მინდა ფეხბურთზე ფოკუსირება, ხალხი ბევრ რამეზე საუბრობს, ყველამ რაღაც იცის... სიმართლე ისაა, რომ მე მხოლოდ გუნდის დახმარებაზე ვარ ორიენტირებული. კონცენტრირებული და ბედნიერი ვარ პსჟ-ში თამაშით. მადრიდის „რეალთან“ თამაში არ იყო საჭირო იმის მისახვედრად, რომ მსოფლიოს ერთ-ერთ საუკეთესო კლუბში ვთამაშობ“, - აღნიშნა მბაპემ.

შეგახსენებთ, რომ „რეალისა“ და „პარი სენ ჟერმენის“ საპასუხო მატჩი 9 მარტს, მადრიდში გაიმართება. კილიან მბაპეს პარიზულ გუნდთან კონტრაქტი 30 ივნისს ეწურება და მას „რეალს“ ძალიან აქტიურად უკავშირებენ.