ქართველმა მოციგურავე მორის ყვითელაშვილმა სოჭის გრან პრიზე გაიმარჯვა და ქართულ ფიგურულ ციგურაობაში ისტორიული შედეგი დააფიქსირა.

სოჭში გამართულ გრან პრის მეექვსე ეტაპზე მედლების პირველი კომპლექტი გათამაშდა მამაკაცებს შორის, სადაც ერთდროულად ორი ქართველი სპორტსმენი მორის ყვითელაშვილი და სენიორების ეტაპების დებიუტანტი ნიკა ეგაძე მონაწილეობდნენ.

საკმაოდ მაღალი კონკურენციის პირობებში, დაძაბული ორდღიანი ასპარეზობის შემდეგ, ორი პროგრამის ჯამში, 266.33 ქულით სოჭის ეტაპის გამარჯვებული და ოქროს მედლის მფლობელი ქართველი მოციგურავე მორის ყვითელაშვილი გახდა. ამ რანგის ტურნირზე მოპოვებული ოქროს მედალი, რომელშიც 8 ქვეყნის 12 რეიტინგული მონაწილე ასპარეზობდა, პირველი შემთხვევაა საქართველოს ფიგურული ციგურაობის ისტორიაში.

თავისუფალ პროგრამაში შესრულებული სამი ოთხმაგი ნახტომი, პროგრამის მხატვრული წარმოდგენა და სრიალის ხარისხი მსაჯების მიერ მაღალი ქულებით შეფასდა და მსოფლიო რეიტინგულ ნუსხაში მორის ყვითელაშვილი წამყავნ პოზიციაზე აღმოჩნდა ევროპის ჩემპიონატისა და ოლიმპიური თამაშების წინ.

მოკლე პროგრამაში წარუმატებელი გამოსვლის შემდეგ ურთულესი ტექნიკური ელემენტებით დატვირთული თავისუფალი პროგრამა წარმოადგინა სენიორების დებიუტანტმა ნიკა ეგაძემ, რომელმაც ორი ოთხმაგი ნახტომითა და სხვადასხვა სირთულის სამმაგი ნახტომებით შეძლო ჯამში 159,82 ქულის დაგროვება და თავისუფალ პროგრამაში მე-7 პოზიციის ჩვენება, ჯამში კი 210.17 ქულით მე-11 ადგილით დაასრულა ტურნირი.