იტალიის სერია A-ს მე-13 ტურში „რომამ“ „ჯენოას“ 18 წლის თავდამსხმელის, ფელიქს აფენა-გიანის დუბლით 2:0 მოუგო. მატჩის შემდეგ ჟოზე მოურინიომ თქვა, რომ ახალგაზრდა ფეხბურთელს საჩუქრად ძვირადღირებულ ფეხსაცმელს უყიდის.

„მე მას დავპირდი, რომ ძვირადღირებულ ფეხსაცმელს შევუძენდი, რომელიც 800 ევრო ღირს. ვწუხვარ ბატონი ალბერტო დე როსის გამო („რომას“ ახალგაზრდული გუნდის მწვრთნელი, დანიელე დე როსის მამა - რედ), მაგრამ ახლა აფენა ჩვენთან დარჩება. ხვალ კი წავალ და ბუცებს ვუყიდი“, - თქვა მოურინიომ.

აფენა-გიანი „ჯენოასთან“ მატჩში მოედანზე 75-ე წუთზე გამოჩნდა და მწირი სათამაშო დროც ეყო, რომ დუბლი შეესრულებინა. ის 2003 წლის 1 იანვრის შემდეგ დაბადებული პირველი ფეხბურთელია, რომელმაც სერია A-ში გოლი გაიტანა. „რომა“ 13 ტურის შემდეგ 22 ქულით მეხუთე ადგილზეა.