ნიდერლანდების ეროვნული ნაკრების წევრობის კანდიდატი და აწ უკვე „ალკმაარის“ ყოფილი ფეხბურთელი მირონ ბოადუ კარიერას „მონაკოში“ გააგრძელებს. როგორც ლიგა 1-ის კლუბის ოფიციალური ვებგვერდი იუწყება, ფეხბურთელმა ხუთწლიან კონტრაქტს მოაწერა ხელი. ტრანსფერის სანაცვლოდ ნიდერლანდელებმა 17 მილიონი ევრო მიიღეს.

ბოადუ „ალკმაარის“ აკადემიის აღზრდილია და პირველ გუნდში 2017 წლიდან თამაშობდა. მას შემდეგ საკლუბო დონეზე მირონმა 88 მატჩი ჩაატარა, გაიტანა 38 გოლი და 18 საგოლე გადაცემა შეასრულა.

ეროვნულ ნაკრებში ბოადუმ ერთხელ ითამაშა 2019 წელს, ევროპის საკვალიფიკაციო ეტაპზე და ესტონეთთან სადებიუტო შეხვედრაში გოლი გაიტანა. 20 წლის თავდამსხმელი ყველა ასაკობრივი ნაკრების წევრი იყო, ხოლო 21 წლამდელთა გუნდში 2019 წლიდან მოყოლებული 12 შეხვედრაში 11 გოლი გაიტანა.