საქართველოს ეროვნული საფეხბურთო ნაკრები სეზონის მეორე ოფიციალური მატჩისთვის გლაზგოში ემზადება. თემურ ქეცბაიას ხელმძღვანელობით ეროვნული ნაკრების წევრები შოტლანდიაში გუშინ ჩავიდნენ და სასტუმრო “მერიოტში” დაბინავდნენ.

საქართველოს ფეხბურთის ფედერაციის ვებ-გვერდის ცნობით, გუნდმა საღამოს ექვს საათზე პირველი ვარჯიში ჩაატარა. “სენტ მირენის” სტადიონზე ნაკრებმა 16-კაციანი შემადგენლობით მსუბუქად ივარჯიშა. ამ ეტაპისთვის ეროვნულ გუნდს ტრავმის გამო ორი მოთამაშე გამოაკლდა – “ემპოლის” ფორვარდი ლევან მჭედლიძე და “ვიტესის” მცველი გურამ კაშია.

შაბათს დაგეგმილი მატჩისთვის გუნდი ამ ეტაპისთვის 22-კაციანი შემადგენლობით გააგრძელებს მზადებას. გლაზგოში დღის ბოლოს ჩავიდნენ ჯაბა კანკავა, თორნიკე ოქრიაშვილი, გიორგი ლორია და ავთანდილ ებრალიძე.

ნაკრებს დღეს შეურთდებიან კვიპროსული “ოთელოსის” ქართველი ლეგიონერები ლევან ხმალაძე და როინ კვასხვაძე. ევროპის 2016 წლის ჩემპიონატის საკვალიფიკაციო ეტაპის მატჩი შოტლანდიასა და საქართველოს შორის 11 ოქტომბერს ჩატარდება.