ესპანეთის ლიგა ენდესას ნახევარფინალში გიორგი შერმადინის „ლენოვო ტენერიფე“ ითამაშებს. ქართველი ცენტრის გუნდმა მეოთხედფინალში თად მაკფადენის „სან პაბლო ბურგოსს“ სერია მშრალად, 2:0 მოუგო.

მეორე შეხვედრა კანარიელებმა ადვილად, 92:68 მოიგეს, მიუხედავად იმისა, რომ პირველი ტაიმის მერე 6 ქულით აგებდნენ. მესამე და მეოთხე პერიოდში „ტენერიფემ“ მეტოქე გაანადგურა და გამარჯვება იზეიმა.

გიორგი შერმადინმა 27:18 წუთში 11 ქულა, 3 მოხსნა და 1 პასი მიითვალა, რის შედეგადაც მისი მარგი ქმედების კოეფიცინეტი 21-ს გაუტოლდა. ქართველი ცენტრი ამ მაჩვენებლით მხოლოდ მარსელინო უერტასს ჩამორჩა (28).

თად მაკფადენმა 20:47 წუთი ითამაშა და ხსენებულ დროში 10 ქულა, 1 მოხსნა და 4 პასი შესძინა საკუთარ გუნდს, რომელიც მარცხისგან ვერ იხსნა.

„ლენოვო ტენერიფე“ ნახევარფინალშია, სადაც „ბარსელონასა“ და „ჟუვენტუტს“ შორის გამარჯვებულს შეხვდება.