ბარსელონას „ესპანიოლი“ ერთწლიანი პაუზის შემდეგ ლა ლიგაში დაბრუნდა. კატალონურმა კლუბმა სეგუნდა დივიზიონიდან აღზევება სეზონის დასრულებამდე ოთხი ტურით ადრე გაინაღდა.

38-ე ტურში „ესპანიოლი“ „სარაგოსას“ ესტუმრა და უგოლო ფრეც საკმარისი გამოდგა იმისთვის, რომ ელიტის საგზური მოეპოვებინათ. ბარსელონელებს 78 ქულა აქვთ და მესამე ადგილზე მყოფ „ალმერიას“ 12 ქულით უსწრებენ, ურთიერთშეხვედრებშიც სჯაბნიან და შესაბამისად, საუკეთესო ორეულში ადგილი დაიბევეს.

„ალმერიას“ ღირსებას კი მოგეხსენებათ გიორგი მაკარიძე იცავს, მაგრამ გაუჭირდება ლა ლიგაში პირდაპირ გადასვლა, რადგან მეორეადგილოსან „მალიორკას“ 6 ქულით ჩამორჩება, რაც 4 ტურით ადრე მცირე სხვაობა არაა და დიდი ალბათობით, პლეი-ოფში მოუწევს ელიტაში გადასვლისთვის ბრძოლა.