ვეტერანმა ესპანელმა მეკარემ იკერ კასილიასმა კრიშტიანუ რონალდუს შესახებ ისაუბრა და განაცხადა, რომ პორტუგალიელის წარმატების მთავარი მიზეზი პროფესიონალიზმი და ამბიციურობაა.
თუმცა, ამავდროულად, იკერს მიაჩნია, რომ რონალდუს ლიონელ მესისთან კონკურენციაც დაეხმარა განვითარებაში.
„ცხადია, რომ კრიშტიანუ რონალდუ პროფესიონალია. ის ზრუნავს საკუთარ თავზე, სწორად იკვებება, ასევე საჭირო ყურადღებას აქცევს დასვენებას. გარდა იმისა, როგორი ფეხბურთელია, აგრეთვე დიდი სპორტსმენია. მას ყოველთვის შია გამარჯვება და ცდილობს განვითარებას, რათა უკეთესი გახდეს. შესაძლოა, მის გაუმჯობესებას ლიონელ მესისთან მეტოქეობამ შეუწყო ხელი, მაგრამ ძირითადად ეს პროფესიონალიზმისა და ამბიციურობის შედეგია. ყოველივე ამან ის საფეხბურთო მწვერვალზე აიყვანა.
იმედი მაქვს, კიდევ დიდხანს გააგრძელებს კარიერას. ყველამ ვიცით, რომ გარკვეულ ეტაპზე ყველაფერი სრულდება და დრო ყველას წინააღმდეგ თამაშობს. იმედია, მისი ფეხბურთით სიამოვნებას დიდი ხანი შევძლებთ, მაგრამ ძნელია იმის პროგნოზირება, როდის დაასრულებს რონალდუ კარიერას“, - თქვა კასილიასმა.
შეგახსენებთ, რომ იკერ კასილიასი და კრიშტიანუ რონალდუ მადრიდის „რეალში“ 2009-2015 წლებში თანაგუნდელები იყვნენ.
