ევროლიგის მეცხრე ტურში თორნიკე შენგელიას მოსკოვის ცსკა სტუმრად კაუნასის „ჟალგირისს“ დაუპირისპირდა და დაძაბულ ბრძოლასი 87:78 სძლია. რუსებმა პირველ პერიოდში მოიპოვეს 9-ქულიანი უპირატესობა (26:17) და სწორედ ეს სხვაობა დაფიქსირდა თამაშის ბოლოსაც, თორემ დანარჩენი სამი მეოთხედი მართლაც დაძაბული იყო.

თორნიკე შენგელიასგან ახალი არაფერი გვინახავს, ქართველი მძიმე ფორვარდი მოსკოვურ გუნდს ჯერჯერობით ისე ვერ გაუშინაურდა, როგორც „ბასკონიას“. ამჯერადაც არაფრით გამორჩეული თამაში ჰქონდა. თორნიკემ 25:24 წუთში 7 ქულა, 4 მოხსნა და 3 პასი მიითვალა. შენგელიამ 9-დან მხოლოდ 2 ორქულიანი და 1-დან 1 სამქულიანი ჩააგდო, ხოლო 2 საჯარიმო ააცილა. მისი მარგი ქმედების კოეფიციენტი 3 აღმოჩნდა...

ცსკა-ს რიგებში საუკეთესო მაიკ ჯეიმსი იყო, რომელმაც 27 ქულას 5 მოხსნა დაამატა და მარგი ქმედების კოეფიციენტი 32 ჰქონდა. რუსულმა გრანდმა ეს თამაში ლიეტუვაში სწორედ ამერიკელის ლიდერობით მოიგო.

ცსკა-ს 9 ტურის თავზე 6 მოგების საპირწონედ 3 წაგება აქვს და მესამე ადგილზეა „ბარსელონასა“ და „ბაიერნის“ შემდეგ, ხოლო მომდევნო ტურში 19 ნოემბერს, მიუნხენში სწორედ „ბაიერნს“ ესტუმრება.