ჩემპიონთა ლიგიდან გავარდნის შემდეგ, „ბარსელონას“ მთავარვარსკვლავის, ლიონელ მესის გარშემო ათასნაირი ხმები დაირხა, ბევრი საინფორმაციო წყარო ამტკიცებს: არგენტინელს „ბარსელონას“ თრევა მოსწყინდა და ამ ზაფხულს სხვა კლუში გადავაო. ძირითადად „ინტერს“ და „მანჩესტერ სიტის“ ასახელებენ, სადაც გენიოსს ყოფილი დამრიგებელი, პეპ გვარდიოლა ელოდება.
ესპანურმა Marca-მ კი სიტუაციის შესაძლო განვითარების სამი ვარიანტი დაასახელა.
პირველი - ყველაზე რთული. კონტრაქტის გაწყვეტა ამავე ზაფხულს. პრეზიდენტი ბარტომეუ ყველაფერს გააკეთებს, რათა ასეთი სცენარი არ დაუშვას. წინააღმდეგ შემთხვევაში, ის ისტორიაში შევა ადამიანად, რომელმაც მესი „ბარსელონადან“ გაუშვა.
მეორე - ლეო კატალონიურ კლუბში კონტრაქტის ამოწურვამდე, ანუ 2021 წლის ზაფხულამდე, გააგრძელებს თამაშს. მაგრამ მომავალი წლის იანვრიდან უკვე უფლება ექნება სხვა კლუბებთან აწარმოოს წინასწარი მოლაპარაკებები. მის გარშემო ჭორ-მართლის კორიანტელი დადგება, რაც კლუბის ფსიქოლოგიურ მდგომარეობაზე უარყოფითად იმოქმედებს.
მესამე - კონტრაქტის გაგრძელება. მესი კვლავაც ელოდება ხელმძღვანელობის ინიციატივას, თუმცა, ხანგრძლივი ხელშეკრულების წინააღმდეგია.