ინგლისის პრემიერლიგის 30-ე ტურმა სტარტი ორი მატჩით აიღო და მთავარი ლონდონში, „ტოტენჰემისა“ და „მანჩესტერ იუნაიტედის“ დაპირისპირება გახლდათ. ორივე გუნდი ჩემპიონთა ლიგის საგზურისთვის იბრძვის და სხვაობა მანკუნიანელთა სასარგებლოდ 4 ქულა იყო.

ჟოზე მოურინიოს ფაქტორიც მნიშვნელოვი გახლდათ, „ტოტენჰემამდე“ ხომ „იუნაიტედს“ ავარჯიშებდა. ყოფილი გუნდის დამარცხებასთან პორტუგალიელი საკმაოდ ახლოს იყო, მაგრამ ქულით მოუწია გულის ჯერება.

სტივენ ბერგვინის ტაიმის შუაწელს გატანილი გოლით „დეზები“ დაწინაურდნენ, რასაც 81-ე წუთზე ბრუნო ფერნანდეშმა პენალტით უპასუხა და საბოლოო ანგარიში დააფიქსირა.

„ტოტენჰემი“ 42 ქულით მერვე ადგილზეა, ხოლო „მანჩესტერი“ 46 ქულით მეხუთეა. დღესვე „საუთჰემპტონმა“ მნიშვნელოვანი გამარჯვება იზეიმა და აუტსაიდერი „ნორვიჩი“ 3:0 მისსავე მოედანზე გაანადგურა.

„ტოტენჰემი“ – „მანჩესტერი“ 1:1 (1:0)

გოლები: 1:0 ბერგვინი (27), 1:1 ბრუნო ფერნანდეში (81, პენ)