პორტუგალიური „ნასიონალის“ პრეზიდენტმა რუი ალვეშმა Tuttosport-ს ინტერვიუ მისცა, რომელშიც კრიშტიანუ რონალდუს შესახებ ისაუბრა. როგორც იცით, პორტუგალიელი ვარსკვლავი მშობლიური კლუბის ბაზაზე ინდივიდუალურად ემზადება და ფორმის შენარჩუნებას ასე ცდილობს.
რუი ალვეში ამაყია, რომ მათთან გაზრდილმა რონალდუმ უდიდეს წარმატებას მიაღწია და ისტორიაში საუკეთესო ფეხბურთელი გახდა.
- როგორ გაჩნდა იდეა, რომ რონალდუსთვის სტადიონი გაგეხსნათ და ევარჯიშა?
- კრიშტიანუმ დაგვირეკა და მოხარული ვიყავით, რომ ეს შანსი მოგვეცა. ჩვენ დავემორჩილეთ მადეირას ჯანდაცვის სამინისტროს წესებს და ოქმებს, რომლებიც კორონავირუსს უკავშირდება. კრიშტიანუ ჩვენი ბიჭი იყო და ახლა საუკეთესო მაგალითია „ნასიონალის“ აკადემიისთვის. ეს არის მოდელი მთელი მსოფლიოსთვის, სუპერ პროფესიონალია და ბრწყინვალე ადამიანური თვისებები აქვს. ჩვენი საზოგადოების სიამაყეა, ისტორიაში ყველაზე ძლიერი ფეხბურთელი ჩვენს პატარა კუნძულზე დაიბადა. როდესაც ვუყურებ, რომ კრიშტიანუ ჩვენთან ვარჯიშობს, თავს უფრო ახალგაზრდულად ვგრძნობ. 1997 წელს მე ვიყავი პრეზიდენტი, რომელმაც ხელი მოაწერა „სპორტინგში“ მის ტრანსფერს. მაშინაც ძალიან ნიჭიერი იყო, მაგრამ ვერ წარმოვიდგენდით, რომ ისტორიაში საუკეთესო მოთამაშე გახდებოდა.
- რონალდუ ყოველ დილით ვარჯიშობს?
- არა, ზოგჯერ მოდის დილაობით, ზოგჯერ დღის მეორე ნახევარში. ეს დამოკიდებულია სასწავლო პროგრამაზე. სუპერ მოტივირებულია და მადეირას ჰაერი კიდევ უფრო მეტ ენერგიას აძლევს. მოუთმენლად ელოდება პანდემიის დასრულებას, პირველ რიგში ხალხისა და მსოფლიოს სიკეთისთვის, შემდეგ კი იმიტომ, რომ თამაშის სურვილი აქვს, რადგან ახლაც შესანიშნავ ფორმაშია.
- „იუვენტუსში“ დარჩენას ნამდვილად აპირებს?
- დიახ. ჩემი აზრით, ძალიან მოსწონს „იუვე“, ვფიქრობ და იმედი მაქვს, რომ კიდევ რამდენიმე წელი დარჩება იტალიაში. ვისურვებდი, რომ ამ გუნდში სკუდეტო, ჩემპიონთა ლიგა და „ოქროს ბურთი“ მოიგოს.
