„მანჩესტერ იუნაიტედის“ ნახევარმცველი ბრუნო ფერნანდეში პრემიერლიგის თებერვლის თვის საუკეთესო ფეხბურთელად დასახელდა. აღსანიშნავია, რომ პორტუგალიელისთვის თებერვალი ინგლისში პირველი თვე იყო.

გასულ თვეში ბრუნომ უშუალოდ პრემიერლიგაში სამი თამაში ჩაატარა, 1 გოლი გაიტანა და 2 საგოლე პასი მიითვალა. ლუზიტანელმა მარკოს ალონსოს („ჩელსი“), პიერ-ემერიკ ობამეიანგს („არსენალი“), დომინიკ კალვერტ-ლევინს („ევერტონი), მეთიუ დოჰერტს („ვულვზი“) და ნიკ პოუპს („ბარნლი“) აჯობა.

„კმაყოფილი ვარ ჩემი დასაწყისით, მაგრამ განვითარება უნდა გავაგრძელო“, - განაცხადა ფერნანდეშმა.

პორტუგალიელს მთლიანობაში (ყველა ტურნირზე) „მანჩესტერის“ რიგებში 9 თამაში აქვს ჩატარებული, 3 გოლი გაიტანა 4 საგოლე პასი შეასრულა. პრემიერლიგის გარდა, "იუნაიტედის" თვის საუკეთესო ფეხბურთელადაც დაასახელეს.

მიმდინარე სეზონში პრემიერლიგაში თვის საუკეთესო ფეხბურთელთა ჩამონათვალი კი ასეთია: ტიემუ პუკი (აგვისტო), პიერ-ემერიკ ობამეიანგი (სექტემბერი), ჯეიმი ვარდი (ოქტომბერი), სადიო მანე (ნოემბერი), ტრენ-ალექსანდერ არნოლდი (დეკემბერი), სერხიო აგუერო (იანვარი), ბრუნო ფერნანდეში (თებერვალი).